Luka 24:9-42

⁹Bousa eai se uio, teina ginauri gamagaridi saudoudoi‐esega se heribadi, eo tatao headiyao hinage.

¹⁰Ia ede Maria Magadala, eo Ioane, eo Maria, Iamesi sinana, eo sisine headi maediyao, isi teina ginauri gamagaridi aposotolo tauheribadi ede.

¹¹Edi riba si ene doha piripiridai mo, isi nige se nuatuwataidi.

¹²Petero abo i toro, i aitautau ie lau bousa eai; ie durudobi nige ginauri esau i ita, lulu linen wa isibom se torehesuaradi i itadi, abo ie uio, ginauri wa se tubu wa i noonooedi.

¹³Na, nei asubenana ne adi sasaguyao labui se lau eanua esau esana Emausa, Ierusalema i laoma eanua wa edana lohana maila haligigi‐esega.

¹⁴Taudi labui edi ribariba paana ede teina ginauri gamagaridi se tubu wa.

¹⁵Na, isi ma ribaribadi eo ma nuanuatuidi, Iesu iabom i laoma maedi se laulau esega.

¹⁶Isi matadi nige se lala arinai ia nige se ita lobai.

¹⁷Ia i ribalau aridi eai, i ene, “Emi ribariba saha ina omi au ribariba ma laulaumiu, eo ma nuadubumiu hinage?”

¹⁸Esau, esana Kaleopa, ia arinana i heuio, i ene, “Oa laolaoma tauna mo Ierusalema eai, ginauri wa nei eai se tubu teina asubenadi eai nige u nuatuidi?”

¹⁹Ia ie ribalau aridi eai, i ene, “Ginauridi saha?” Isi se heriba si ene, “Iesu, Nasareta tauna, ribana, ia ede peroveta tauna Eaubada matana eai, eo tatao gamagaridi matadi eai, ena laulau eo ena riba se gigibori ariri.

²⁰Hinage kohena lailaidi eo ada tanuagao ia se moselaei, abo se unuhemate, eo ia se hesatauroyao.

²¹Na, ai ema nuatu ai ene ia Isaraela abo i hemauridi: hinage ginauri wa se tubu wa i laoma e wau ta asubena hehaionana.

²²Mamohoi, ema pele sisinedi headi hinage se henoonooemai, isi maratomtom eai se lau bousa eai;

²³ia sinarena nige se lobai, se laoma, si ene, aneru headi hinage se itadi, isi si ene ia i maurio.

²⁴Isi headi maemai se mia se lau bousa eai, hinage se ita doha hinage sisine wa se ribaei: ia mo nige se ita.”

²⁵Ia abo i ribalau isi aridi eai, i ene, “Omi eauyaure, eo nuamiu tai se porohe, riba gamagamagaridi peroveta se ribaedi nige au ataiedi:

²⁶Keriso teina ginauridi taba i hearodi abo i lu ena namanamari eai, e nige’e?”

²⁷Mose arinai ie tubu, eo peroveta gamagamagaridi, uriuri tabudi gamagamagaridi eai iabom mo ribana i ribahasahasaidi.

²⁸Eanua wa, arinai se laulau wa, se lage hanahanaui: ia ana ao doha i taudaru mo.

²⁹Isi mo ia se nuahi si ene, “U bawa maemai: paana i maimailahio, asubena i lauo.” Ia i awasae numa eai ie bawa maedi.

³⁰Na ia ie bawa hatahata eai maedi se aiai, falawa ie abi, eo i aihelahui, eo i ihi, abo i mosei aridi eai.

³¹Isi matadi abo se lala, ia se italobai, ia matadi eai i tauyamui.

³²Taudi labui edi ribariba si ene, “Nuaboeada eai se alaalasi, ia dobila eai maeda ta ribariba wa, eo ia buka tabuna i hemasarahadi, e nige’e?”

³³Nei mahanana eai ne isi se torohai, se uio Ierusalema, saudoudoi‐esega se lobaidi se oigogo esega, eo adi sasaguyao hinage maediyao.

³⁴Si ene, “Mamohoi, Guiau i toroo i taumasaraha Simona arinai.”

³⁵Wau dobila eai wa wasana se heriheribadi, eo hinage areto ihina arinai ia se italobai.

³⁶Ribana sora ma ribaribadi, na Iesu i toro isi boeadi eai, i ribalau aridi eai, i ene, “Loni au abi.”

³⁷Na isi se matausi ariri, eo se tagugu, edi nuatu si ene earuyarua se ita.

³⁸Ia i ribalau aridi eai, i ene, “Omi saha au nuadubuei? Hari nuatu, hari nuatu, se saha nuamiu eai se saesae?

³⁹Nimagu eo aegu au itadi: eau mo ede ina, au abiitagu abo au ita; earua wa nige bulumana eo nige siadana, doha au ita ea abi ta.”

⁴⁰Ia ie riba ina doha ia nimana eo aena abo i heitadi.

⁴¹Isi sora nige se awamamohoi paana se kode ariri, eo se noonooei, ia i ribalau aridi eai i ene, “Ami aiai, e nige’e?”

⁴²Eama se ligaauriyao tupona se mosei ia arinai, eo amoamo hinage.