San Lucas 22:55-69

⁵⁵Aman weyanlari patelechi selate nin quito, nin lobaito chuminlanue. Junni Pédronan yalabe pechudinue.

⁵⁶Junni aman Pedro tsente chuminca peyun sona manca yaca duque quiranaminnan, yaca manmiito, in tsachiri Jesube penenaminhe tinue.

⁵⁷Pedro mantimini te, yaca natiya quiratumanyoe tinue.

⁵⁸Aman nanni inale manca tsachi yaca quirato, nunan Jesúlabe penenaminhe tinue. Junni Pédrori itsantinue: Te, lari itomanyoe tinue.

⁵⁹Aman man óra tsansi poletobi, manca tsachiri tsarasica pánayoe tito itsantinue: —In tsachiri Jesula cuwenta Galilea to tsachi joe. Junto yabe penenamin jonhoda tinue.

⁶⁰Junni Pedro junca merasi, ¿Tica wari tsanlatinayun? tinue. Lari yaca natiya quiratumanyoe tinue. Junni Pedro tsantinasaleri, walpa apaca panue.

⁶¹Junni walpa pánasale, Miya Jesuri tamochi nechi Pédroca quiraerenue. Junni Pedro Jesuchi fiquica mantenhinue. Jesús Pédrobe itsantica jominue: Amana walpa apaca capatusanan, laca peman neca quiratumanyoe tichunae tica jominue.

⁶²Junni Pedro jun fiquica mantenhito, sela dechi jito duque warenue.

⁶³Aman Jesuca taminlari yaca lucarinato, tedechi quilaquinue.

⁶⁴Junni yachi cacaca doto, yaca quito, Diosichi mantate nuchi tencabi miiniide! latinue mo nuca quinunca.

⁶⁵Junto Jesuca yucacuranato, duque seiton fiquicanan palaquinue.

⁶⁶Aman tseinasa israelita mantaminla tala layailainue. Mantá tan unicala, mantá tan patelela, mantaca micariminla jominlanue. Junto Jesuca yalachica tanjasa carito, yabe

⁶⁷itsanlatinue: —Chiquilabe pade! tilatinue. ¿Nuri Diosi wenteca jun Cristo joyun? tilatinue. Junni Jesús beconan pato itsantinue: —Lari Cristo joyoe tinari, laca natiya quereilaituchunae tinue.

⁶⁸O la nulabe ticatiya panhanari, nulari natiya tulanlaquituchunae, nin laca manlarilaquituchunae tinue.

⁶⁹Tsan josanan, amanale nechi la tsachi ica jun joto Diosichibi chuanae tinue. Ya tsara sonban joto, yachi tsa tede nanchi laca chutechunae tinue yape yabe pemantasa.