Lukas 22:55-69

⁵⁵Umba vatane wo taname raon no yavare umawe ama wanijate rai, umba utantuna rakiani, muno Petrus tuna irati matavon.

⁵⁶Wanya arikainyo manapatambe syeno titi aije inta mo Petrus aen tuna no taname ama tuga. Taname ama vare mba nanto Petrus amune rai, weti wanya so mo amune rayasir kobe, umba mo raura mare, “Sopamo tavondijo Yesus aije inta pi sop.”

⁵⁷Weramu Petrus po Yesus amamarave pare, “Syantukambe vatane wato ai!”

⁵⁸Kavinta umba vatano kaijinta po Petrus aen, umba po raura pare, “Winyamo vatano tavondijo Yesus aije pi winy!” Weramu Petrus po raura akananto ai pare, “Risya jewena!”

⁵⁹Petrus tuna vavaijo uma amije intabo ai, umba vatano kaijinta de soowato ai pare, “Winyamo vatano Galilea, weti tugae rave winyamo vatan watavono Yesus aije inta pi winy ivae.”

⁶⁰Umba Petrus po raura akananto ai pare, “Syantukambe nya ana ndaura so rai!” Arono Petrus payaowa nene, naije kobe mangkuere kokebe.

⁶¹Umba Amisy Yesus sarirae po aerananto. Umba Petrus aemeno Yesus apa ana daura umawe rai pare, “Mangkuere kokebe rainy, indati nyo inamamarave susye mandei.”

⁶²Umba Petrus puje poyo dave.

⁶³Naije naito wo Yesus aman wanaikebe Ai muno wo anepati.

⁶⁴Wo amune ratavano ansune vasye rai umba wo anajo ware, “Winyamo anawae pi Winy, weamo Nyo vatano po nanepate so apa tame raura kakavimbe reansai!”

⁶⁵Umba wo Yesus akaajian dave.

⁶⁶Awatan ngko dave, akarijo Yahudi nawe, syeno akokoe nawe, kuruno Yahudi nawe, wanugan umba wo Yesus augavere te no mansamun indamu wo akanijo Apa ayao kakaije rai.

⁶⁷Umba wo anajo ware, “Reamare Nyo raura kakavimbe reansai: Winyamo Mesiasa pi Win dako?” Weramu Yesus po raura akananto mai pare, “Ranivara Syo raura kakavimbe wasai, weamo wapanave Inaije ramu.

⁶⁸Muno ranivara Syo wasanajo, weamo indati wapo ana inta raura akanande Rinaije ramu.

⁶⁹Weramu kavinta nakato umba Risy, Arikainyo Vatan, ituna no Amisyo Bambunin Dave anem ngkove rai.”