Lucas 22:55-69

⁵⁵Osto ay pinaskhechancha nan ennidnichowancha isnan tengan nan awwichan nan afong, inmey et si Pedro ay nakitoktokcho ken chaicha.

⁵⁶Ngem ket ay wad-ay nan magmagkit ay faa ay nangila ken siya issan nalanglangana. Sa na't insin-eng ay nangwanin, “Esang akhes si ton-a ay fowegna!”

⁵⁷Nay met achi insaot Pedro ay nangwanin, “Anen! Ay kek man ammo siya.”

⁵⁸Osto'y nawnawni is akit, wad-ay kasin nan lalaki ay nangila ken siya. Sa na't kinwanin, “Sik-a akhes nan esang ay fowegna!” Ngem kinwanina, “Ay ke sak-en?”

⁵⁹Away nget esa'y olas ya ket ay wad-ay nan nangipapilit ay nangwanin, “Tet-ewa mampet ay esang na akhes isnan fob-owegna, tay iGalilea!”

⁶⁰Ngem kinwanin kayet Pedro en, “Ay kek man ammo nan kankanam!” Ket ay nanakokook nan kawitan issan cha na enkak-aliyan.

⁶¹Sa et nensakhong si Jesus, ya iilaena si Pedro. Sa na't sinmek nan kinwanin Apo Jesus issan nangwaniyana en, “At sisya'y ad-i enkokook nan kawitan is talan-o, ya at mamitlo ay omisaot ka!”

⁶²Sa et finmala ya nensifesifek.

⁶³Idwani, intachon nan cheycha'y manoktokkhong ken Jesus ay nangang-ango ya nanodsodpak ken siya.

⁶⁴Sa cha't inokopan nan matana ay mangwanin, “Pontowam man mo sino nan nanodpak ken sik-a.”

⁶⁵Sa cha't kayet kinalyakalyan siya is ensakit ay kali.

⁶⁶Osto ay nawiit, naamong nan amam-an nan Judio ya aap-apon si papachi ya nan mimistolon si lenteg, sa cha't inpaayag si Jesus ay manakhang ken chaicha. Sa cha't kinwanin,

⁶⁷“Ibfakham ken chakami mo sik-a nan Cristo.” Ngem kinwanina, “Mo ifaagko ken chakayo, ad-iyo kayet patiyen,

⁶⁸ya mo wad-ay salodsochek ken chakayo, ad-i kayo somongfat.

⁶⁹Ngem mailapo idwani, wad-ay ak ay Anak si Takho ay tomotokcho is kakannawan nan Makabfalin ay Dios.”