San Lucas 21:6-10

⁶—Tsoñꞌen nanꞌmin na cojntyꞌiahoꞌ, mangüentyja xjen na nnanꞌtyuiiꞌ nnꞌanhanꞌ. Minꞌncüii tsjöꞌ jeꞌquintjohanꞌ nacjo ntyjehanꞌ.

⁷Ndoꞌ taxeeꞌhan nnon jon, jnduehan: —ꞌUꞌ ta na matsiꞌmanꞌ ntyja ꞌnaanꞌ Tyoꞌtsꞌon ndëë nnꞌan, ¿Yuu xjen na nndui na nndaꞌ? Ndoꞌ ¿Nin jnꞌaan na ntsiꞌmanhanꞌ na jndë mavaa xjen na nndui nanꞌmin?

⁸Tꞌa jon jndyuehan, tso jon: “Quitquenhoꞌ cüenta na tyiꞌnanꞌviꞌnnꞌan nnꞌan ꞌoꞌ ntyja ꞌnaan jñꞌoonminꞌ. Ee jndye nnꞌan nninncyo na nnduehan na maja conduihan. Nnduehan na nquehin conduihan Mesías. Ndoꞌ nnduehan: Jndë tentyja xjen na ntycüii tsoñꞌen. Majoꞌ tyiꞌnanꞌjonhoꞌ yo nanꞌñeen.

⁹Minꞌ tyiꞌndyuehoꞌ ya conincꞌuaa jñꞌoon na ncꞌoon ndyiaꞌ ndoꞌ na conanꞌve nnꞌan nacjo gobiernon ꞌnaanhan. Ee mancüiixjen jndeiꞌhanꞌ ngüenon jndyee nanꞌminꞌ, majoꞌ tyiꞌcoventyja xjen na ngitsu tsonnangue.”

¹⁰Ndë joꞌ tsontyichen jon ndëëhan: “Nnꞌan ncüii tsonnangue, nnanꞌvehan nacjo nnꞌan ncüiichen tsonnangue. Ndoꞌ ncüii tsanmꞌaantsꞌian tꞌman ntsꞌaa jon tyiaꞌ yo ncüiichen tsanmꞌaantsꞌian tꞌman.