SAN JUAN 11:3-12

³Por mxac len Lars, mtel' ryop bél myen' fta'n Lars mèn co' ngua loo Jesús. Ndxab mèn co' ngua mandada loo Jesús: ―Tad, nu' nde li avis loo U' le' amiu U', Lars, ndyac len, cara.

⁴Co'se' mbìn Jesús di'sa, ndxab Jesús loo mèn co' ngua mandada: ―Yilíiz co' ndyac Larsa, inacte yilíiza co' li par gathpe' Lars. Ndxe'leque', le'i nac par yath yèn cón che'n con' roo con' xèn che'n Diox loo mèn no par ryo xo'f loo mèn cón che'n con' roo con' xèn co' nac cón chenen loo mèn, daa co' nac xgan' Diox.

⁵Mastale' nque' lezo' Jesús ñèe Jesús Mart no Mari, bél Mart, no Lars,

⁶co'se' mbìn Jesús di's co' ndxab mèn co' ngua mandad le' Lars ndyac len, asembli Jesús, ne'ngade Jesús luega xal mblya's ryop bél myen' ftan' Lars. Mbyan' Jesús co'te' ngo Jesús taachop huiz.

⁷Ngolo nguri'th chop huiza, ndxab Jesús loo myen' xin' mté'th Jesús: ―Nda na' par ned le'n yèez co' nac yèezya' che'n làaz mèn jude tedib vez, cara.

⁸Per myen' xin' mté'th Jesús ndxab loo Jesús: ―Maistr, pente ndxàc plá huiz mblya's mèn co' ñibe', no co' ndyoo ner, no co' ndyoo naa loo mèn nación Israel mcua'n mèna mod nguth mèna U' con quèe. No ale ¿ndlya's U' ya U' par neda tedib vez, cà'?

⁹Mtetac Jesús thìb di's loo myen' xin' mté'th Jesús. Ndxab Jesús: ―Nde niin thìb con' loo gu': ¿Ché' ilìcte si' fchop hor nac thìb huiz, cà'? Hui' gu' nexa. Chele' thìb mèn ndyee ndxáal ze, mèna indxezi'fte no indxega'ste mèna ned nda mèna tac xnìi huiz ntenìi loo mèna ned nda mèna.

¹⁰Per mèn co' tyee nii nacuau, mèna ndxezi'fque' no ndxega'sque' mèn loo con' tac yende xnìi co' ntenìi loo mèna ned nda mèna.

¹¹Ngolo tataa ndxab Jesús di's loo myen', ndxab Jesús loo myen': ―Lars co' ndxàc amiu na' naxyàt. Per nalle' daa ga lo' mcal' loo Lars.

¹²Sya, ndxab myen' xin' mté'th Jesús loo Jesús: ―Tad, chele' Lars naxyàt, peser más ndoo yath ndac Lars, ¿lé'?