Samu 89:2-49

²Embena mona retenge renge palu palyuo palira. Dee embena yaki nyii nange renge yakena mendeko ingyuo pingi pyao sulu sera doko namba silyu.

³Akali nambana rombo palyisi pipa lao kana minyilyu. Nambana kendemande akali Dapitipa

⁴para pyao nyere dupwa kiŋiko ingyuo parami. Embena para pyao nyere wambu keta kiŋinya isingi yulu doko boneŋe sinya lao nyakaro lee kande.

⁵Yake pandana aŋala dupwame keyange pilini dupwana kenane pilyaminyi. Kamongo, embena mondo lao pingi dokona lao pilyaminyi.

⁶Yakena karenge dupwa Kamongo emba yale daa. Aŋala dupwa embapamanda manji nara.

⁷Yake pandana aŋala mupwa dupwa wato lenge dokopa emba ketae nembo lenge. Peparaeme emba mupwa lao suu pyaopako karenge.

⁸Kamongo Anatu Porai Wakasa emba yale mende daa. Yulu peparaena Kamongo emba isa paa nange.

⁹Ipwa kotaporai doko minyuo iso karenge. Kasakole minyuo naro ipupwa lao epenge doko meme pingi.

¹⁰Koo renge mena poraingi Oreapa lenge doko emba yuu mendaki kalyuo pyao kumasii. Embena porainya renge dokona embena yandapimwai dupwa nyuo anamasi minyii.

¹¹Yake doko embena ingyuo silyamo. Dee yuu doko opetaeko. Embame yuupi yuu muu dupwana bange wakale wakale singi dupwape wasii.

¹²Yuu parali dolapo wasiinyi silyamo. Yuu Tapo Emonepa kyau dolapome embena lao rae maiyuo kenane pyakange.

¹³Anemapwae. Emba ama porai renge wakasa palenge. Embena porai renge doko bange mendepa manda manjipa nalyamo.

¹⁴Embena isingi yulu doko rolae pingi rengepe kote rolae lenge rengepe dolapona ingyuo renge kuiyaro karapyamo silyamo. Embena mona reto pingipi mondo lao pingipi dolapo yulu pipi dokona panelyamo.

¹⁵Emba mona joo misi kenane pyao kingi wapambupi lakandenge wambu nakama rae maiyuo paramilyamo. Nakama embena anjiki pingi renge eŋa pasi dokona moko ware pyuo karenge.

¹⁶Emba karenge dokona lao nakama rae maiyuo pao yuu kwuanyi serenge. Dopa pyuo embame keyange pingi dupwana lakandenge.

¹⁷Emba keta renge kuiyuo namwa anamasi minyingi renge jingi. Embena mona retenge dokona moko karo anamasi minyingi.

¹⁸Kamongo embame namwa kyawa minyara doko rombo palyiipya. Emba doko Isaraele wambunya Anatu Poo Pyasi dokome namwa kiŋi doko jiipya.

¹⁹Yuu wamba embena kendemande akali yulu mondomondo lao pingi dupwa keta pii repa repa pyuo lao, Nambame ami yanda pyuo mupwa ingiyamo doko kiŋinya kyawa rarange maiyuo namba wambu kareyaminyi dokona rombo palyiyu doko kiŋinya petenge isa doko maiyu.

²⁰Nambame nambana kendemande akali Dapiti baa mamba poo pyasi dokome kiso kiŋi ingyuo karena lao piyu.

²¹Nambana porai renge dokome baapa yuu peparae role pyao karara. Nambana porai dokome baa porai sinyi pyambwara.

²²Banya yanda pimwai dupwame baa randa mainya pyuo lisa pirami. Koo pingi dupwame baa kapa pyuo anamasi minya narami.

²³Banya yanda pimwai dupwa kalyuo inji ranji pinyi nembapala baapa epe kanda nalyaminyi dupwa pyao kumakaro.

²⁴Nambame baa mona wakasa reto baa keta renge renge soo kararo. Nambamebanya yanda pimwai anamasi minyingi inginyi pyambwaro.

²⁵Nambamebanya isingi yulu doko ipwa kota andake Metitaraniane pete lenge dokona piso renge kuiyapala pao ipwa Yuporisa dorena ando nyimbunya lao piru.

²⁶Dokopa baame namba kando, Emba nambana rakange dee nambana Anatuŋu, lara. Emba nambana kyawa minyingi dee nambana lete wai pyao nyingi akali karene, lara.

²⁷Nambame baa wane mupwasa ingyaro. Kiŋi doloma peparae manda manji nao ketaele karena lao piru.

²⁸Nambame baapa pii lalu lao leyo lao suu pyao kararo. Deelao kana minyiyambano doko sulu soo sera.

²⁹Baa keta piso kiŋi para pyao paraminyi dokona mendeko kiŋi ingyapa pira. Banya isingi yulu doko yake doko pingi pyaro karamo dopako ingyuo puu para.

³⁰Dopa pyuo paramopape banya para pyao nyeramo dupwame nambana mawa pii minya nao kamba lapala nambana yulu katape singi dokona paa napala

³¹mata joo karapala nambana mana pii laronuli pyuo moko minyuo paa narami ramo

³²doko nakamana koo dupwana lao randadokome peponame ingyuo pyaro. Nambame nakamana kyai pirami dupwana randadokome isareme ingyuo kisaro.

³³Dopa pirunupape nambame Dapitipamona retenge kata doko rokwa napala baapa pii mende lalu lao leyo dokonaisa nemba naroko.

³⁴Nambame baapa kana minyuo lalu lao leyono doko yala naowape dee pii lalu lao leyono dupwana mendepe nyuo alowa pyuowape pii naro.

³⁵Nambana kingi poo pyasi dokona lao yuu gii mendakisa leyo doko yuu peparaena ingyuo pena lao lalu lao leyonosa piya. Doko Dapitipa kyambo ingyuo pena lao pii naro.

³⁶Yuu peparae banya para pyao pyaramo dupwa rembe naa naramopa banya kiŋi yulu doko nambana lenge kambu dokona neta rao karamo dopale ingyuo soo puu para.

³⁷Dopako pyuo kana doko yake dokona rao karalu karengeŋe lao panenge doko suu pyao banya isingi yulu doko pano sera.

³⁸Dakepa kiŋi emba range rombo palyii dokona lao emba baa mata maipala yaki nyuo imbwualene.

³⁹Embena kendemande akali kiŋi dokopa kana minyuo pii lalu lao leene doko mee inginyi nembee. Embame kiŋinya kyawa rarange doko yuunya kupinyi yaki nyipisa mee yuu parapala kwaelyamo.

⁴⁰Embame banya taone dokona kame porai doko pyao lalyanyi nembee. Dopa pipala banya anda porai dupwa pyao kokwa sii.

⁴¹Wambu baa repetale kata pumi dupwame banya bange dupwa waa nyuo kaelyaminyi. Banya parali maki dupwame peparae baako kando giyalya giyana pilyaminyi.

⁴²Embame banya yanda pimwaimi baa pyao anamena lao kae. Nakamana monarename rae mainyipyambwakamii.

⁴³Embame banya yanda kakupi dupwa nyuo nenge kara nange ingyanyi pyambwapinyisa yanda angi dokona baa anamasi minyilyaminyi.

⁴⁴Embame baa kiŋi ingyuo kara nanale lao nyuo isa palyapisa banya isingi yulu doko otelyamo.

⁴⁵Embame baa banya yuu gii oto emapa napyamopa kanya kapwa pyuo minyuo pyaminyisa baa elyako nyilyamo.

⁴⁶O Kamongo, emba yuu peparae yalu pyuo karalu kararese? Yuu akipare embena imbu singi doko isare ingyuo rao kararamo kararese?

⁴⁷Kamongo embame akali dupwa yuu malu kararaminde daa lamo doko suu pyao karape. Embame namwa wasiinyipape namwa kumungi dokona ingyuo pelyamo laosuu pyaowako karape.

⁴⁸Api mendeme kuma nao mee karalu kararase? Apa pyuo malu anda paa naro lao range porayapala karalu kararamisi?

⁴⁹Kamongo embame baa mona retalu reto reteene doko anja peyape? Embena lalu lao lenge pii Dapitipa leyambinyi dupwa anja silyase?