SALMOS 89:2-49

²Na niquijto: “Ta titetlasojtlas para nochipa. Huan nochipa tiitztos titemachtli san queja para nochipa huejcahuas elhuicac campa tiitztoc.”

³Ta tiquijtojtoc para tijchijqui se tlajtolsencahuali ica motlatequipanojca David tlen tijtlapejpenijtoc. Titlatestigojquetzqui tlen tijchihuilis.

⁴Tiquilhui para se iixhui mosehuis ipan isiyaj campa yajaya tlanahuatía, huan nopano tlanahuatis para nochipa.

⁵TOTECO, tlen itztoque ipan elhuicac mitzpaquilismacaj ipampa nochi nopa chicahualnescayotl tlen tijchihua. Huan miyac millones moelhuicac ejcahua mitzhueyimatise pampa titemachtli.

⁶Pampa ipan nochi elhuicac axaca seyoc tlen san se queja ta, Toteco Dios. Huan niyon se elhuicac ejquetl ax quipiya chicahualistli queja tlen tijpiya ta, Toteco.

⁷Toteco Dios, ta nelía tihueyi huan titemajmati. Nochi motlatzejtzeloltijca elhuicac ejcahua mitztlepanitaj. Quena, nochi tlen mitzyahualojtoque, majmahuij quema moquetzaj moixpa.

⁸TOTECO, ta tiDios Tlen Tijpiya Nochi Chicahualistli, ¿ajqueya seyoc tlahuel quipiya chicahualistli queja ta? ¡Axaca seyoc! San ta TOTECO tlahuel tijpiya chicahualistli. San ta nelía titemachtli.

⁹San ta tihueli tijnahuatía nopa hueyi atl quema mosisinía huan mocoxonía chicahuac. Tijtlacahualtía huan quichihua tlen tiquilhuía.

¹⁰Ta tijtzontlamilti nopa tlen temajmatiyaya ipan hueyi atl. Ica mohueyi chicahualis tiquinsemanqui mocualancaitacahua.

¹¹Ta moaxca elhuicactli, tlaltepactli huan nochi tlen onca, pampa nochi tijchijchijqui ta.

¹²Tijchijchijqui nopa norte huan sur. Nopa tepetini Tabor huan Hermón paquij pampa ta tiquinchijchijqui.

¹³Moajcol tlahuel quipiya chicahualistli. Huan monejmatl quipiya tetili huan miyac yajatili para tlatlanis.

¹⁴Motlanahuatilis motlatzquilijtoc ipan ome tlamantli: Titetlajtolsencahua xitlahuac huan tijchihua tlen cuali. Titeicnelía huan tiquijtohua tlen melahuac.

¹⁵Nelía paquij nopa tlacame tlen quicaquij nopa tlapistli tlen quinnotza ma mitzhueyichihuaca, TOTECO. Inijuanti nemise nelía monechca huan ta tiquintlahuilis.

¹⁶Mojmostla mopaquilismacase ipan ta pampa tlahuel tihueyi huan tixitlahuac.

¹⁷Pampa san ta tijpiya mohueyitilis huan tiquinfuerzajmaca. Titlacame tijpiyaj chicahualistli pampa ta titechpalehuía.

¹⁸Quena, Toteco Dios, ta tlen titlatzejtzeloltic titechmocuitlahuía tojuanti ipan tlali Israel. Ta titotlanahuatijca.

¹⁹Ipan se tlanextili tijcamahui motlatzejtzeloltijca tiocamanalojca huan tiquilhui: “Tlen nochi tlacame nijtlapejpenijtoc se yejyectzi telpocatl tlen tlahuel mosemaca, huan nijtequitlali ma eli tlanahuatijquetl para na.

²⁰Quena, nijpantijtoc notlatequipanojca David huan nicaltijtoc ica nopa aceite tlen ica niteiyocatlalía para ma nechtequipanoca.

²¹Nijchihuas ma eli temachtli huan nijmacas chicahualistli.

²²Ax quiicnotlalise icualancaitacahua, niyon ax quitlanise tlaixpanoca tlacame.

²³Iixpa niquintzontlamiltis icualancaitacahua huan nochi tlen quicocolíaj.

²⁴Na tlen nitemachtli nijmocuitlahuis huan nijtiochihuas ajachica, huan tlahuel miyac niquicnelis. Ica na notlapalehuil yajaya elis tlahuel hueyi.

²⁵Na nijchihuas para itlanahuatilis pehuas campa atemitl Éufrates, huan tlamis hasta campa hueyi atl tlen itoca Mediterráneo.

²⁶Huan yajaya nechtzajtzilis huan nechilhuis: ‘¡Ta tinoTata, ta tinoTeco Dios! Ta tlen tinechmaquixtía huan tinechtlatía para ax tleno nechajsis.’

²⁷Na niquitas nopa tlanahuatijquetl queja noachtohui cone. Nijchihuas para yajaya ma eli nopa tlanahuatijquetl tlen más hueyi ipan nochi tlaltepactli.

²⁸Niquicnelis para nochipa huan para nochipa nijchihuilis tlen cuali. Huan nopa tlajtolsencahuali tlen nijchijtoc ihuaya, ax quema tlamis.

²⁹Na nijtequimacas se iixhui para ma tlanahuatis campa yajaya tlanahuatiyaya. Itlanahuatilis huejcahuas para nochipa queja huejcahuas elhuicactli.

³⁰Pero intla iconehua quitlahuelcahuase noley huan ax monejnemiltise queja quiijtohua notlamachtil,

³¹o intla quiixpanose tlen niquinnahuatijtoc ma quichihuaca ipan ininyolis huan ax quintlepanitase notlanahuatilhua,

³²huajca niquintlatzacuiltis pampa ya nopa quinextis para ax nechneltocatoque huan tlajtlacolchihuaj.

³³Pero ax nijcahuas niquinicnelis, niyon ax nijtlamiltis nopa tlajtoli tlen nijchijtoc ininhuaya.

³⁴Ax niquilcahuas tlen ica nimocajtoc David huan ax nijpatlas notlajtol.

³⁵Pampa na nitlatestigojquetzqui para nijchihuilis David nochi tlen nijtlajtolcahuilijtoc. Huan na niDios tlen nitlatzejtzeloltic ax hueli niistlacatis.

³⁶Iixhui mosehuis huan tlanahuatis para nochipa campa ya mosehui. Itlanahuatilis huejcahuas san queja imiyaca tonali tlahuijtos tonati.

³⁷Quena, itlanahuatilis tlahuel huejcahuas queja huejcahuas metztli, o queja huejcahuas nochi tlen eltoc ipan elhuicac tlen eltoque queja notestigos.” Quena, queja nopa tiquijto, Toteco.

³⁸¿Huajca para tlen tinechtlahuelcahua huan tinechhuejcamajcahua? ¿Para tlen tlahuel ticualani ica yajaya tlen tijtlapejpenijtoc para elis tlanahuatijquetl?

³⁹¿Huelis tijxolejtoc nopa tlajtoli tlen tijchijqui ihuaya? Pampa eltoc queja tijmajcahua icorona hasta tlalchi.

⁴⁰Tijcahuili tocualancaitacahua ma quihuelonica nopa tepamitl tlen yahualtic quitzacuayaya toaltepe. Huan quintlamixolejque nopa caltini tlen huejcapantique campa timomanahuiyayaj.

⁴¹Nochi tlen panoj nopano quiixtequij tlen inijuanti quinequij. Huan nopa tlacame tlen itztoque tonechca san techhuetzquilíaj.

⁴²Tiquinfuerzajmacatoc tocualancaitacahua, huan tiquinchijtoc ma paquica pampa techtlantoque.

⁴³Tijquixtili itlatequiyo tomachete tlen ica titlatehuiyayaj, huan ax tijnejqui techpalehuis para ma titlatlanica.

⁴⁴Tinechquixtili noyejyejca huan tijmajcajtoc hasta tlalchi notlanahuatilis.

⁴⁵Tinechchihuilijtoc ma nitlalochhuehuentiya huan tinechpinahualtijtoc iniixpa nochi tlacame.

⁴⁶TOTECO, ¿hasta quema tlamis ticualantos? ¿Hasta quema noja timotlatijtos tlen tojuanti? ¿Huelis para nochipa mohueyi cualancayo eltos queja tlitl?

⁴⁷¡Toteco, xiquilnamiqui para toyolis ax huejcahuas ipan ni tlaltepactli! ¿Huelis ax tleno ipati nopa yolistli tlen tiquinmacatoc nochi tlacame?

⁴⁸Niyon se tlacatl ax huelis itztos para nochipa. ¡Nochi miquise! ¿Ajqueya huelis quimanahuis iyolis imaco miquistli?

⁴⁹NoTeco Dios, ¿canque eltoc moteicnelilis tlen huejcajquiya? ¿Para tlen ayoc tijpiya hueyi moyolo ica tojuanti? Ta tiToteco tlen titemachtli, tijtlajtolcahuili David para melahuac ax quema tinechtlahuelcahuas.