Samu 34:2-14

²Agiꞌaleꞌmo aliꞌna asaga huꞌna atesugeꞌapaeꞌmo apakufamo aliꞌa afepi neꞌataya vayaꞌmogi afiteꞌapaeꞌmo apamogaga aigae.

³Nagaegiꞌeꞌmo hutaeꞌmo, Ala kava neꞌmo ala agi vekamo maiꞌniye, huta magokepi higetao. Agiꞌaleꞌmo magokepi alita asaga higetao.

⁴Koli huꞌna maiꞌneꞌnaeꞌmo naha maesiyafeꞌmo kahauya huꞌna nunumu huꞌnogeno afitenoꞌaeꞌmo naha maeꞌnigeꞌna koli osuꞌna afaꞌa maiꞌnove.

⁵Vayaꞌmogimo ageteꞌapaeꞌmo amuse huꞌa maiꞌnayaꞌmofeꞌmo ani kava hutapa agegenoꞌao lapaipamoꞌmo kana osino.

⁶Nagaemo lokiya vekamo oꞌmaiꞌnovaꞌmofeꞌmo agaefekeꞌmo keya aeꞌna ge huꞌnogeno Ala kava neꞌmoꞌa afiꞌniye. Afitenoꞌaeꞌmo muki hanageke yapatiꞌmo nagufamo alino katino nateꞌniye.

⁷Ala kava neꞌmo enisole vekaꞌamoꞌmo Ala kava nefeꞌmo koli nehaya vayaꞌaiteꞌmo yagaino ku aino apateteno apakufamo alino katino neꞌapate.

⁸Ala kava neꞌmo kanale vekamo maiꞌniye hutapa agegayanagi ageyo. Ala kava nepiꞌmo fala kiꞌa neꞌmaiya vayaꞌmo Goti aulagaleꞌmo alagepa huꞌa maiꞌnayanageꞌa afaꞌa apamogaga aigae.

⁹Lapaote vayaꞌmo maiꞌnayanagi Ala kava nefeꞌmo koli hutetapa akame hiyo. Koli huteꞌa akame nehaya vayaꞌmogimo kafu osugae.

¹⁰Laiyoni anaꞌaumogi apaka neteyaꞌmonanafa Ala kava neꞌmo agesayafeꞌmo kahauya nehaya vayaꞌmogimo muki alagepa yaꞌmo aliteꞌapaeꞌmo kafu nosae.

¹¹Mafaꞌne anagaꞌmogitapamo etapa geꞌnimo afiyo. Ala kava nefekeꞌmo koli hutetapa akame hisaya kavaꞌmo aliꞌna lapaya malegauvanagi eyo.

¹²Alagepa hutapa yatala afinaꞌmo maiꞌnetapa lapamogaga aisayafeꞌmo lapauꞌnifiye.

¹³Inagi lapauꞌnisiyana hosu gemo osuge aigofe gemo osuge hisayafeꞌmo alagepa hutapa yagaitapa lapateyo.

¹⁴Hosu kavategatiꞌmo maitapa halove hutapa eta alagepa kavakeꞌmo hiyo. Kaveta osutapa alagepa hutapa magokepi lokaetapa maisayafeꞌmo kahauya hutapa vegala aeyo.