Salmo 34:2-14

²Ibpegalbu ku is Nengazen, ne sikiyu is menge edèdaaǥen, pemineg kew wey medlipey.

³Duma kew kedì te edalig te Nengazen; edsevaha kiw te kedalig kandin.

⁴Mid-ampù a ziyà te Nengazen ne midtavak e zin. In-awè din is langun he kegkehandek ku.

⁵Ebmelipayen is menge etew he edsarig diyà te kandin, ne kenè dan en egkepeel-elezan.

⁶Mibpengumew is egkaayuayu he etew te Nengazen, ne midtavak din sikandin. Midlibri zin sikandin te langun he kelised din.

⁷Ebentayan te velinsuǥuen te Nengazen is menge etew he edtahud te Nengazen, ne edlibriyen din sikandan te kezeetan.

⁸Gezami niw wey niw metueni ke sengemenu keupiya is Nengazen. Utew zeyzey is etew he midsarig te pengalang te Nengazen kandin.

⁹Sikiyu is metinumanen he menge etew te Nengazen, tehuza niw sikandin. Su is menge edtahud kandin, egkekuwa zan is langun he kinahanglan dan.

¹⁰Is menge erimaung egkehimu he egkaamin is keenen dan ne egkengevitil zan, iyan, is menge etew mulà he edangep diyà te Nengazen, kenà egkeeminan te meupiya he menge vutang.

¹¹Hendini kew is egkengesuat he mebmetau, pemineǥa a keniyu. Ebpenuruen ku sikiyu te kedtahud te Nengazen.

¹²Egkesuat kew ve he mekaangken te kelipey wey melugayad he untung?

¹³Likayi niw is kegkaǥi te mezaat wey kedtarùtarù.

¹⁴Likayi niw is mezaat he vaal, ne iyan niw veeli is meupiya. Himuwa niw is paaǥi para layun melinew is kebpekidepitè niw te zuma.