Salomore Gae 4:10-16

¹⁰O ŋokac biŋe âgo‐nane, maŋge norao domame biaŋke‐jâmbâŋkekac, maŋge nore domame aŋacnukac i manape waiŋ opâre aŋacnuekac irec sâc sirickekac, â rurua wokemaŋ opâgere âsunezi wiac âsu biaŋ gâcne sirickekac wâc.

¹¹O ŋokac biŋe‐nane, bipicge i aŋac baŋacne, â nameŋ rurumaŋgao baŋac â susu fokac tinac ekac, erâ ŋaqigere âsu i Lebanoŋ tikire âsu irec sâc.

¹²O ŋokac biŋe âgo‐nane, go ʒariŋ gie motâc herâ ki bakicne irec sâc, â opâ ʒâŋe bâbâzickekicne iŋucne.

¹³Go jufu gie iŋucne, maŋnao jâc nâkicne â hâmu ɋoza wiac doma rakac.

¹⁴Erâ ʒariŋ wiac âsunehec â wiac nânânezi âsu biaŋ fuŋne fuŋne fua rakac wâc.

¹⁵Go jufu gieo opâ ʒâŋe fokac izi nombâŋkonec wefurâ ɋiɋicne raekac irec sâc, â Lebanoŋ tikionec opâ sâko wahaekac iŋucne.

¹⁶O jowarec, go fuŋkerâ qawarec, O mula, go iŋuc jaha qawarec, ehuc jufu gie‐nane fificnepire âsu biaŋ‐ticne ŋeiŋnerâ razejec. Ehame joroc biaŋ‐nanezi jufu gie‐ticnao warerâ jâcfâri aŋac baŋacne nâ bac ezejec.