Kinera Koari na Kinerakera 4:10-16

¹⁰Agoi na loaqu na qua babaere, variva qetu hola sa mua tataru; sa mua tataru si liṉiliṉi lea hola nia sa vaeni, sa lumu humaṉa lea koa goi si hola ni sari doduru pule!

¹¹Sari berumu, loaqu, si lomoso guana namu zipale; sa meamu si guana koa ia meleke na kolo zipale. Sari mua poko si humaṉa lea guana huda sida pa Lebanoni.

¹²Loaqu, na qua babaere, agoi si guana inuma ta bara tukuna; na inuma tomena, meke na bukaha ta hukatana.

¹³Sari mua linetelete si na inuma pomeqaraneti siṉia na vuvua lomosodi, meke na havoro naqarita meke na oela nadi;

¹⁴na humaṉa lea tadi na havoro saparoni, na oela kalamusu, meke na huda sinamoni. Na oto huda moa si toqolo vasina meke na aloesi meke doduru lumu humaṉa lea pule.

¹⁵Agoi si na bukaha sapu va bobosia sa inuma, meke na tototolo kolo lomoso, sapu zoloro maena pa toqere Lebanoni.

¹⁶Vaṉunu, agoi givusu togarauru, mu mae, agoi givusu pa kali gevasa! Mi givusu mae ia sa qua inuma, pude paleke vura nia sa humaṉa lea tanisa. Va malumu mae ia sa qua babaere koasa nana inuma, mani va liṉiliṉi i sari na vuvua lomosodi.