Salmos 90:5-13

⁵Dxegú' bénneache ca dxun guba'u, da dxua na xúgute̱ xizre laga ca'. Zaj naque̱' ca tu bchigala da dxexenite na gate dxexebandxu.

⁶Zaj naque̱' ca tu xixre' da dxegula na che zílala. Dxegula na, ne dxelá'te̱ na xiaj, na' xelate' zua gubizra dxelechugue̱' na, na' dxebizre na.

⁷Dxebía xi'ntu' lawe' da dxezra'u netu'. Sté̱bele̱'e̱ zúantu' lawe' da dxezrá'le̱'u netu'.

⁸Dxenna'u ca da cale̱la da nuntu'. Dxulé'enu' láwela zria da nabágantu'.

⁹Dxuzáchiu' iza chee̱ntu' lawe' da dxezra'u netu'. Dxelexedú iza chee̱ntu' ca tu be' da dxecá'antu'.

¹⁰Ca zaj naca zra naca bantu', zaj naca na ga xun chi iza, na' che nácantu' benne' wal-la, waca bantu' du tápalalaj iza, san ca zaj naca iza ca', dxedentu' xel-la' zi', ne dxéquentu' ze̱de. Chadí dxeledé iza ca', na' xenítentu'.

¹¹¿Nuzra núnbea xanne' ca naca xel-la' dxezrá'a chiu'? ¿Nuzra núnbea ca naca xel-la' xichaj zra'a chiu'?

¹²Ble'e netu' ca láteze zaj naca zra chee̱ntu' chee̱ gácantu' benne' dxeléajni'ine̱'.

¹³Xran, bexaca netu' tuze. ¿Bátadxa chenu'? Bexache lazre' netu', we̱n zrin chiu'.