SALMOS 89:7-35 - Dižaʼ chaweʼ kub len Salmo kaʼ

SALMOS 89:7-35

Click on verse(s) to share them!

⁷Benne' ka' zej nnite'e ya'abá žápegake' Dios ba la'ne na' yógo'te benne' chie' ka' ẕžébegake' Ḻe'.

⁸X̱anto' Dios, ẕnna bi'o benne' zante, benne' žjake' ḻo wdiḻe, nníta'gake' ya'abá. Bi zoa no benne' nake' ka nako' Le', X̱ana' Dios. Nako' Benne' wáḻeḻe'e, na' nakkzo' ḻi ḻaže'.

⁹Ẕnna bi'o nisdo' dan' ẕgo'nen. Kate' ẕgo'nḻe'en Le' ẕbek žion'.

¹⁰Blej bchochjo' benne' Egipto ka', na' bgá'ngake' ka to da' gat. Besḻaso' benne' ka' bi ẕḻé'egekle' Le' chawe' ḻen no'o wáḻeḻe'e.

¹¹Chio' Le' nak ya'abá, na' chio' Le' nak yežlyó. Beno' yežlyó nga, na' da' ka' nníta'gaken ḻawlen.

¹²Beno' da' de cheḻá'a gan za' be' zag, na' da' de cheḻá'a gan ẕde wbíž byo' zag ka'. Ḻo yeḻa' žebele žoḻgak Ya'a Tabor, na' Ya'a Hermón chio' Le'.

¹³Benne' wáḻeḻe'e nako' Le', na' ẕenḻe'e nak yeḻa' wak chio'.

¹⁴Ḻo da' chawe', na' ḻo da' ḻi ḻaže' ẕnna bi'o. Ḻo yeḻa' ži'i ḻaže' na' ḻo da' ḻi ḻaže' žono' yógo'te.

¹⁵Ba nez ẕen naken chegak benne' ka' žóḻgake' da' žoe ḻáwgake' Le', na' zej zoe' ḻo yeḻa' baní' chio', X̱ana' Dios.

¹⁶Ni'a chio' Le' žebéḻe'egekle' dot ža, na' želyenle' x̱tižo'o Le' dan' nako' chawe'.

¹⁷Nakkzo' Le' yeḻa' waḻe chegak benne' ka', na' ḻezka' yeḻa' x̱tan chégake'. Žono' neto' wáḻeže dan' naken da' žénekzlo' gono'.

¹⁸X̱anžo Dios žape chi'e žo'o, na' Dios la'y chegak benne' Israel ka' ẕchi'le' žo'o.

¹⁹Ža ni'te bchaḻjo' da' bḻoe'elo' benne' chawe' ka', benne' wen žin chio' ka', na' wnnó': “Ba wžía' to benne' waḻe ladjw benne' chia' ka'. Bena' ga ẕnna bi'e, na' žákḻena' ḻe'.

²⁰Wžía' Dabí, benne' wen žin chia'. Bzoakza' ḻe' nich gake' benne' wnná bia'.

²¹Neda' gákḻenteza' ḻe'. Ḻen yeḻa' wak chia' gon chocha' ḻe'.

²²Benne' ka' bi ẕḻé'egekle' ḻe' chawe' bi gak bi da' góngake' chie', na' benne' wen da' ẕinnj ka' bi gak góngake' ḻe' ẕia.

²³Wléj wchochjkza' benne' ka' bi ẕḻé'egekle' ḻe' chawe', na' wkwasa' benne' ka' ḻawe' ḻe'. Wžía yi'a benne' ka' ẕží'igake' chie' ḻe'.

²⁴Ží'itezla' ḻe', na' gaka' ḻi ḻaže' ḻen ḻe', na' ni'a chia' neda' golže yeḻa' wnná bia' chie'.

²⁵Gona' ga nna bi'e do ẕente žoa'a nisdo', na' do ẕente žoa'a yegw Éufrates.

²⁶Ḻe' yi'e neda': Le' nako' X̱a'. Nako' Dios chia'. Žape chi'o neda', na' žesló' neda'.

²⁷Neda' wzóa' ḻe' ka ẕi'na' blo, na' nna bi'e yógo'te benne' wnná bia' ka' dot yežlyó.

²⁸Ží'itezla' ḻe', na' sóateze diža' da' bénḻena' ḻe'.

²⁹Gona' ga sóatezegak ẕa'sóe' ka', na' nna biá'gake' ḻo wlaze' ḻe' x̱ak zoa ya'abá.

³⁰Cha' wsangak ẕa'só Dabí ka' da' bchi'la' ḻe'e, na' cha' bi góngake' ka nak da' goža' ḻégake',

³¹na' cha' wzóagake' cheḻa'ale da' bsedla' ḻégake', na' cha' bi góngake' kan ẕnnakza' neda',

³²na' wsaka' zi'a ḻégake' dan' ẕží'igake' chia' neda', na' chinnja' ḻégake' yid dan' žóngake' da' ẕinnj,

³³san bi wsana' kan nži'ila' Dabí, na' bi wsana' gak ḻi ḻaža'a ḻen ḻe',

³⁴na' bi gaḻ ḻaža'a diža' da' bénḻena' ḻe', na' bi wchá'a da' ba wnnía'.

³⁵To chi'ize bzetj kwina', bchebe ḻaža'a bi da' gona', na' batkle gon ḻaža'a che Dabí.