6Bi zoa no benne' ya'abá, bennen' nake' ka nakkzo' Le', X̱ana' Dios. Bi zoa no benne' nake' benne' ẕente ka nako' Le'.
7Benne' ka' zej nnite'e ya'abá žápegake' Dios ba la'ne na' yógo'te benne' chie' ka' ẕžébegake' Ḻe'.
8X̱anto' Dios, ẕnna bi'o benne' zante, benne' žjake' ḻo wdiḻe, nníta'gake' ya'abá. Bi zoa no benne' nake' ka nako' Le', X̱ana' Dios. Nako' Benne' wáḻeḻe'e, na' nakkzo' ḻi ḻaže'.
9Ẕnna bi'o nisdo' dan' ẕgo'nen. Kate' ẕgo'nḻe'en Le' ẕbek žion'.
10Blej bchochjo' benne' Egipto ka', na' bgá'ngake' ka to da' gat. Besḻaso' benne' ka' bi ẕḻé'egekle' Le' chawe' ḻen no'o wáḻeḻe'e.
11Chio' Le' nak ya'abá, na' chio' Le' nak yežlyó. Beno' yežlyó nga, na' da' ka' nníta'gaken ḻawlen.
12Beno' da' de cheḻá'a gan za' be' zag, na' da' de cheḻá'a gan ẕde wbíž byo' zag ka'. Ḻo yeḻa' žebele žoḻgak Ya'a Tabor, na' Ya'a Hermón chio' Le'.
13Benne' wáḻeḻe'e nako' Le', na' ẕenḻe'e nak yeḻa' wak chio'.
14Ḻo da' chawe', na' ḻo da' ḻi ḻaže' ẕnna bi'o. Ḻo yeḻa' ži'i ḻaže' na' ḻo da' ḻi ḻaže' žono' yógo'te.
15Ba nez ẕen naken chegak benne' ka' žóḻgake' da' žoe ḻáwgake' Le', na' zej zoe' ḻo yeḻa' baní' chio', X̱ana' Dios.
16Ni'a chio' Le' žebéḻe'egekle' dot ža, na' želyenle' x̱tižo'o Le' dan' nako' chawe'.
17Nakkzo' Le' yeḻa' waḻe chegak benne' ka', na' ḻezka' yeḻa' x̱tan chégake'. Žono' neto' wáḻeže dan' naken da' žénekzlo' gono'.
18X̱anžo Dios žape chi'e žo'o, na' Dios la'y chegak benne' Israel ka' ẕchi'le' žo'o.
19Ža ni'te bchaḻjo' da' bḻoe'elo' benne' chawe' ka', benne' wen žin chio' ka', na' wnnó': “Ba wžía' to benne' waḻe ladjw benne' chia' ka'. Bena' ga ẕnna bi'e, na' žákḻena' ḻe'.
20Wžía' Dabí, benne' wen žin chia'. Bzoakza' ḻe' nich gake' benne' wnná bia'.
21Neda' gákḻenteza' ḻe'. Ḻen yeḻa' wak chia' gon chocha' ḻe'.
22Benne' ka' bi ẕḻé'egekle' ḻe' chawe' bi gak bi da' góngake' chie', na' benne' wen da' ẕinnj ka' bi gak góngake' ḻe' ẕia.
23Wléj wchochjkza' benne' ka' bi ẕḻé'egekle' ḻe' chawe', na' wkwasa' benne' ka' ḻawe' ḻe'. Wžía yi'a benne' ka' ẕží'igake' chie' ḻe'.
24Ží'itezla' ḻe', na' gaka' ḻi ḻaže' ḻen ḻe', na' ni'a chia' neda' golže yeḻa' wnná bia' chie'.
25Gona' ga nna bi'e do ẕente žoa'a nisdo', na' do ẕente žoa'a yegw Éufrates.
26Ḻe' yi'e neda': Le' nako' X̱a'. Nako' Dios chia'. Žape chi'o neda', na' žesló' neda'.
27Neda' wzóa' ḻe' ka ẕi'na' blo, na' nna bi'e yógo'te benne' wnná bia' ka' dot yežlyó.
28Ží'itezla' ḻe', na' sóateze diža' da' bénḻena' ḻe'.
29Gona' ga sóatezegak ẕa'sóe' ka', na' nna biá'gake' ḻo wlaze' ḻe' x̱ak zoa ya'abá.
30Cha' wsangak ẕa'só Dabí ka' da' bchi'la' ḻe'e, na' cha' bi góngake' ka nak da' goža' ḻégake',
31na' cha' wzóagake' cheḻa'ale da' bsedla' ḻégake', na' cha' bi góngake' kan ẕnnakza' neda',
32na' wsaka' zi'a ḻégake' dan' ẕží'igake' chia' neda', na' chinnja' ḻégake' yid dan' žóngake' da' ẕinnj,
33san bi wsana' kan nži'ila' Dabí, na' bi wsana' gak ḻi ḻaža'a ḻen ḻe',
34na' bi gaḻ ḻaža'a diža' da' bénḻena' ḻe', na' bi wchá'a da' ba wnnía'.
35To chi'ize bzetj kwina', bchebe ḻaža'a bi da' gona', na' batkle gon ḻaža'a che Dabí.
36Wnnía': Sóatezegak ẕa'sóe' ka', na' nna biá'gake' ḻo wlaze' ḻe' ḻawa' neda' x̱ak zoa wbíž.
37Yeḻa' wnná bia' chie' sóatezen choch x̱ak zoa byo' ya'abá. Sóatezen choch x̱ak zoa ya'abá.”
38Le', Dios, wléj yichjo', na' bzo' cheḻa'ale bennen' wžío', na' ẕžá'aḻi'o ḻe'.
39Bzo' cheḻa'ale diža' dan' bénḻeno' Dabí, benne' wen žin chion', na' bka'no' ka'ze yeḻa' wnná bia' chie'.
40Bchinnjo' ze'e da' wdape chi'in yež ẕen chien', na' bchinnjo' yógo'te yo'o waḻe, da' ka' wdape chí'igaken yežen' ḻo wdiḻe.
41Yógo'te benne' ka' ẕdégakze' ga na' ẕbángake' da' ka' gota' chie', na' benne' yež gawze ka' žon dítjgekle' ḻe'.
42Beno' ga bzéx̱jwgak benne' ka' ḻe', benne' ka' bi ẕḻé'egekle' ḻe' chawe', na' žebéḻe'egekle'.
43Bchinnjo' da' ka' ẕkonle' žin ḻo wdiḻe, na' bi gókḻeno' ḻe' ḻo wdiḻen'.
44Bekó'o yeḻa' ẕen chie', na' bka'no' ka'ze yeḻa' wnná bia' chie'.
45Beno' ga nake' ka to benne' gole kate' ne zoe' yiz kwide' chie', na' beno' ga žedoe'ele'.
46X̱anto' Dios, ¿to chi'ize bi yenlo' cheto'? ¿To chi'ize ẕža'akzo' neto'?
47Bejsá' ḻaže' soa' yežlyó nga to chí'ido'ze. Beno' ga zoagak nbangak yógo'te benne' to chí'ido'ze.
48Nitó benne' bi soe' nbane' to chi'ize. Yógo'tie' gátgake'. Nitó benne' bi yelé' ḻo na' yeḻa' got.
49X̱anto' Dios, ¿biž nži'ilo' Dabí kan bchebe ḻažo'o, na' wnnakzo' gono'?