Salmos 80:1-8

¹Asafarinchich tputs yandamarini; yuw Apanllish pang' Irusarinush yasimpan taarangu, anoo. Apaa, shiyamari Osiyarinchichee ksutarangsha. Opeejaa ksutamapan tamapari ashirush machtarangsha. Shiy kanindush kurakish kuxinshishimunish kuxineerush, sundarurish shiyaa ksutkanaya. Ashiri Apaa, iyaa k'kini mazinangcha.

²Iyashchee tputs, Osiyarin nlluranuri Efrayinchichee, Manaseschicheetstam wanasiri napangcha, Apaa. Mishat Benjaminchicheetstam wanasiritam napangcha. ¡Támangi, Apaa! Wizpurpatatish tputsee tapachindangcha.

³Apaa, yusur iyaa ichingarootsini wanasir taamaam wayangcha. Iyaa wanasiri napkush, tapachindangcha, atiniya.

⁴Apaa, shiy kizpurtishcha. Shiyamari kasirush taaksha. ¿Ashiri mayaamsha tputsireetsish nda istaksha? Iy shiyaa, Istapanda atuni, mashkuni, itaru shiysha tsiyantakush nda iyaa istaksha. ¿Ashinooja tsiyanis zambazachish?

⁵Iyaa kapung kiyung yacharangush, nda katungkuni, nduntam waakuni, ichingaru zar tanukuni taakiniya.

⁶Minshuch tputs iyanung watsiri taakana, anin iyaa tsapunee itutsimaam zandkanaya. Kundararini iyaa kasirangusin, iyaa stakanaya.

⁷Apaa, shiyamari kasirush taaksha. Yusur iyaa wanasir taamaam wayangcha. Iyaa chinakush tapachindangcha.

⁸Iyaa zitaminarineetsini Ijiptomand tsap kizarunaatspaz ashirush, xpuyarush, nish Kanaanushsha tsap yushindarangsha. Kanaanshuchee tputsee kasirangush, tpachingarangsha. Sheerush iyashcheetssha kizarunaatspaz ashirush anush tsap tatsumirangsha.