SALMOS 80:1-14

¹Benle cheto', Dios. Le' žape chi'o benne' Israel ka'. Le' žape chi'o ẕa'só Jwsé ka' ka ẕila' ka'. Ži'o latje blo chio' dan' zoan ḻáwlegak wbás chio' ka' nzi' lágake' kerubín.

²Bḻoe'e ḻaw yeḻa' ẕen chio' ḻawgak ẕa'só Efraín, na' Benjamín, na' Manasés. Bḻoe'e ḻaw yeḻa' wak chio', na' da, yesló' neto'.

³Bezí' neto', Dios. Beyache' ḻaže'l neto', na' yelato'.

⁴X̱anto' Dios, napo' dot yeḻa' wak. ¿To chi'ize žo'o neto' na' bi yenlo' da' nnablto' Le'?

⁵Beno' Le' ga žak nyache' ḻáže'to', na' nis ẕbežto' naken da' že'j žawto'.

⁶Bi'o latje benne' gawze ka' bká'ngake' neto' ka'ze. Benne' ka' ẕžá'agake' neto' ben dítjgekle' neto'.

⁷Bezí' neto', Dios. Napkzo' Le' dot yeḻa' wak. Beyache' ḻaže'l neto', na' yelato'.

⁸Bebejo' neto' ka to lba uba ḻo yežlyó Egipto. Blago' benne' ka' wnníta'gake' nga, na' gozo' lba uba na' nga.

⁹Wdape chi'o lba uba na' nich golen. Ben lba uba na' lwen, na' bgakwn yežlyón'.

¹⁰Wló'on ẕoḻ yógo'te ya'a ka', na' ni'a ne'n ka' wló'ogaken ẕoḻ yag sedro ẕen ka'.

¹¹Bzáḻa'gaken ni'a ne'n, da' ka' bžíngaken žoa'a nisdo', na' bžíngaken žoa'a yegw Eufrates.

¹²¿Biẕ chen' bkwaso' le'je da' wdáp chi'in lban'? Na'a benne' ka' ẕdégake' ga na' ẕbángake' uba chen.

¹³Ẕlejgak koch yix̱e' ka' lba uba na', na' bia yix̱e' ka' žáwgakban'.

¹⁴Bedá cheto', Dios, napkzo' Le' dot yeḻa' wak. Bwia neto' zaka' ya'abá, gan zoakzo', na' da yedjḻe'elo' da' žaken che lba uba chion'.