SALMOS 72:1-13

¹Dios, ben ga wchi'a ḻaže' benne' wnná bia' da' žak cheto' kan ẕchi'a ḻáže'kzo' Le', na' ben chawe' x̱kwide' ka' che benne' wnná bian'.

²Naž ḻe' wchi'a ḻaže'e cháwe'do' benne' chio' ka'. Ka nak da' naken dot da' li wchi'a ḻaže'e benne' chio' ka' ẕzáka'ḻe'egake'.

³Ḻaw ya'a ka' chejga'ngak chawe' benne' chio' ka', na' ḻaw ya'ado' ka' kwézgake' ḻo da' nak chawe'.

⁴Wchi'a ḻaže'e benne' wláž ka' ẕzáka'ḻe'egake'. Yeslé' x̱kwide' ka' chegak benne' ka' žiážjegekle'. Wžía yi'e benne' ka' žsáka'gake' benách chio' ka'.

⁵Chébeteze benne' wnná bian' Le', x̱ak zoa wbíž, na' byo'.

⁶Gak benne' wnná bian' ka nis yejw da' žaken ga naz, na' ka ẕlelj da' žeẕjwn ḻo yežlyó.

⁷Ḻo ža ka' che benne' wnná bian' gak da' chawe', na' ga'ngak cháwe'do' benne' ka' x̱ak zoa byo'.

⁸Nna bi'e dot yežlyó nga, žoa'a Yegw Éufrates, na' do ẕente yežlyó.

⁹Wzóa ẕibgak benne' dot yežlyó ḻawe' ḻe', na' wzex̱jwe' ḻáže'gak benne' ka' ẕžá'agake' ḻe'.

¹⁰Benne' ẕnna bi'e yež Tarsis, na' benne' ẕnna bi'e yež zi'to' ka' zedjnoé'e da' wnéẕjwgake' chie', na' benne' ẕnna bi'e yež Sabá, na' benne' ẕnna bi'e yežlyó Seba wnéẕjwgake' chie' yeḻa' wnni'a.

¹¹Yógo'te benne' wnná bia' ka' wzóa ẕíbgake' ḻawe' ḻe, na' benne' yógo'te yež góngake' žin chie'.

¹²Ḻe' yeslé' benne' ka' žiážjegekle', benne' ka' žḻížgake' ḻe', na' yeslé' benne' ka' ẕzáka'gake', na' bi zoa no benne' gákḻene' ḻégake'.

¹³Yeyache' ḻáže'le' benne' yache' ka', na' benne' ka' žiážjegekle'. Yeslé' benne' yache' ka' nich sóagake' nbángake'.