Text copied!
CopyCompare
Xela wezria cube nen salmo caʼ - Salmos - Salmos 68

Salmos 68:6-34

Help us?
Click on verse(s) to share them!
6Dxun Dios xelezúa xrtia ljwezre bénneache quebe nu xrtia ljwezre̱' zaj zra'. Dxebéaje̱' benne' zaj xu'e̱ lu na' benne' zitu' ca' chee̱ xelezúe̱' lu da ba neza. Benne' ca' dxeledábaga Dios zaj zue̱' tu lu xe̱zr la xu bizre.
7Dios, gate bdxúaju' lau bénneache chiu', ne gudáu' lu xe̱zr la xu bizre na',
8na' guzrú' xe̱zr la xu na'. Cá'anqueze gúcale̱'e̱ xiuj lau Dios. Xi'a Sinaí guzrize na lau Dios, Dios chee̱ benne' Israel ca'.
9Gusel-lu' tu nisa xiuj zílale̱'e̱, Dios. Gate belexedú lazre' bénneache chiu', Lue' btipu' lazre̱'.
10Bénneache zaj naca chiu' zaj zúaqueze̱' lu xe̱zr la xu chiu'. Dute̱ da chawe' chiu', Dios, dxuxú' benne' xache' ca'.
11Xránadxu Dios gusel-le̱' tu dizra' chawe', na' gulezrá' benne' zante̱, benne' buluzenne̱' bénneache ca naca dizra' chawe' na'.
12¡Buluzrúnnuje̱'! ¡Buluzrunnuj wenná bea ca' nen ca naca benne' chee̱' dxjaque̱' wedil-la, na' benne' ca' zaj nagá'ana lu xu'u lizre̱' belexequé̱'e̱ da bulucá'ana benne' ca' buluzrúnnuje̱'.
13Lácala bcache cuínale naga dxuxúele zrila' ca', gacu zra lánale da naca na ca xrila bgúgudu ca' da zaj nazí lechítaje̱ na plata, na' dube' chee̱ xrílaba' ca' zaj nazí lechítaje̱ na oro.
14Gate be̱se dinnaj Dios zrente̱ wenná bea ca' lataj na', na' bexruj bezxe' da bgacu na xi'a Salmón.
15Tu xi'a zrente̱ naca xi'a Basán. Tu xi'a zri'a naca xi'a Basán na'.
16¿Bizr chee̱ na' dxenna'le, le'e, xi'a zri'a ca', xi'a na' naga dxaca lazre' Dios súaqueze̱'? Da líqueze súaqueze Xránadxu lu xi'a na' chadía chacanna.
17Da zaj naché̱' benne' ca' lu wedil-la da napa Dios zánete̱ cue' gaxúa zaj naca na. Xránadxu Dios zezé̱'e̱ xi'a Sinaí chee̱ sue̱' lataj lá'azxa chee̱'.
18Begüénu' xabáa, zeche̱'u benne' ca' bebéaju' lu na' xel-la' gute, na' guzi'u da chawe' ca' da belunna bénneache, ne cá'anqueze guzúa da be̱nnu' chee̱ benne' ca' guledábague̱' Lue', chee̱ súaquezu' ládujla bénneache, Dios, leu' Jah.
19¡Gaca ba Xránadxu! ¡Tu zra tu zra dxusezrate̱' dxi'u da chawe' chee̱'! ¡Naque̱' Dios, dxuselé̱' dxi'u!
20Dios, Bénnea' naque̱' Dios chee̱dxu guselé̱' dxi'u. Lé̱queze Xránadxu Dios guselé̱' dxi'u lu na' xel-la' gute.
21Da líqueze Dios gune̱' we̱' xichaj benne' ca' dxeledábague̱' Le̱'. Gune̱' we̱' xichaj benne' quebe dxulusane̱' ca zaj naca dul-la da dxelune̱'.
22Gunná Xránadxu: “Guna' xezrinle lázrele, xeza'ale lu xi'a Basán. Guna' xeza'ale lu da situj chee̱ nísadau', xezrinle lázrele,
23lawe' da guna' guchuchu guléajle dxen chee̱ benne' ca' dxeledábague̱' le'e, na' xelelé̱'e̱ becu' chee̱le dxen chee̱ benne' ca'.”
24Belelé'e bénneache ca guledá bénneache chiu' belúe lá'ane̱' Lue', Dios. Dute̱ xel-la' dxelebé gulu'e̱ lataj lá'azxa chiu', Dios, Wenná Bea chia'.
25Benne' ca' dxelul-la zeajzrie̱' láwe'la, na' benne' zaj nu'e̱ da dxulucuezre̱' zja'aque̱' bzé̱bela. Ládujla zjaca nu'ula cuíde'du ca' zaj núxrube' da du ca' dxulusézxebe'.
26Le güe lá'ana Dios naga zaj nazraga bénneache chee̱'. Le güe lá'ana Xránadxu, le'e nácale zri'ine zre sua Israel.
27Zaj zra' zri'ine zre sua Benjamín na', guque̱' benne' cuídedxa, na' dxelenná be'e̱. Zaj nazraga benne' xíchaje̱ chee̱ zri'ine zre sua Judá na', ne benne' xíchaje̱ chee̱ zri'ine zre sua Zabulón, ne benne' xíchaje̱ chee̱ zri'ine zre sua Neftalí.
28Dios, ble'e lau xel-la' wal-la chiu'. Bzua chacha, Dios, da na' be̱nu' chee̱ntu'.
29Ne̱ chee̱ xel-la' szren chee̱ xudau' chiu' da zua na xe̱zre Jerusalén, xelegú'u benne' wenná bea ca' da xelunne̱' lau'.
30Gudil-la benne' dxjaque̱' wedil-la chee̱ dute̱ xe̱zr la xu zaj nazrague̱' chee̱ xeledíl-lale̱ne̱' Lue', benne' ca' zaj naque̱' ca be̱zre zan ca' nen biadu chee̱ba' ca', cadxa xuluzúa xúgute̱' dizra' chiu', na' xelunne̱' ca naca xia plata da zaj nape̱'. Be̱se dinnaj benne' dute̱ xe̱zr la xu dxelexezaca ba lazre̱' xelezúe̱' lu wedil-la.
31Xelelá' benne' xíchaje̱ chee̱ xe̱zr la xu Egipto. Benne' xe̱zr la xu Etiopía xelune̱' ba xen xulucá'ana szrene̱' Dios.
32¡Le gul-la chee̱ Dios, le'e zrale du gabí'i xe̱zr la xu! ¡Le gul-la chee̱ Xránadxu!
33¡Le gul-la chee̱ Bénnea' dxe'e̱ xabáa na'ala, da zua na nédxute̱! ¡Le nna' xque, wanné̱', ne zízrajle̱'e̱ nne̱'!
34¡Le nne̱ nápale̱'e̱ Dios xel-la' waca! ¡Lu xel-la' szren chee̱' dxuxúequeze̱' benne' Israel ca', na' zran xabáa nalá' xel-la' waca chee̱'!

Read Salmos 68Salmos 68
Compare Salmos 68:6-34Salmos 68:6-34