Salmos 66:1-18

¹Le gucá'ana szren Dios dute̱ xel-la' dxebé, le'e zrale dute̱ xe̱zr la xu.

²Le gul-la ca naca xel-la' szren chee̱ le̱'. Le gucá'ana szrene̱' gate dxue lá'anale Le̱'.

³Le xe̱ Dios: “Dxebánele̱'e̱quezentu' ca zaj naca da nunu'.” Ne̱ chee̱ xel-la' szren chee̱ xel-la' waca chiu' xuluzúa xrtizru' benne' ca' dxeledábague̱' lue'.

⁴Xúgute̱ bénneache zaj zra' dute̱ xe̱zr la xu xelúe lá'anaqueze̱' Lue', ne xelúl-laqueze̱' chiu'. Tu xelúl-lazqueze̱' chee̱ Láquezu'.

⁵Le da, lé'ele ca zaj naca da nun Dios. Da zrébedxu zaj naca da be̱ne̱' chee̱ benne' ca' belune̱' da cale̱la.

⁶Be̱ne̱' bexaca nísadau' xu bizre. Guledé bénneache chee̱' ní'aze̱' naga nedxu de̱ tu xe̱gu situj. Dxu'a nísadau' na' gubéle̱'e̱dxu lau Dios.

⁷Dute̱ xel-la' waca chee̱' nna be'e̱ chadía chacanna. Dxuxúequeze̱' ca da dxelún bénneache dute̱ xe̱zr la xu. Benne' dxeledábague̱' Le̱' quebe xelezrué'equezne̱' xel-la' szren.

⁸Le'e, bénneache, le gucá'ana szren Dios chee̱dxu, ne le guzén bénneache ca da dxue lá'anale Le̱'.

⁹Lé̱queze̱' bxue̱' dxi'u chee̱ naca bandxu, ne quebe be̱'e̱ lataj cheajcházedxu.

¹⁰Lué'queze bxu' netu' ca da be̱ntu', Dios. Bdeu' netu' xel-la' zi' ca dxelún bénneache dxuludée̱' xia plata lu xi' chee̱ xegá'ana chawe na.

¹¹Be̱nu' xeajchú'untu' tu lu xralaj. Bda'u cúzruntu' tu xua zí'ile̱'e̱.

¹²Be̱nu' guledé xíchajntu' benne' zaj zrie̱' bzrina' chee̱' ca'. Gudentu' tu lu xi', ne tu lu nisa situj, na' bebéaju' netu', ne bzu' netu' tu lataj naga zúantu' lu da ba neza.

¹³Chú'uqueza' lu xu'u lizru' chee̱ guzézxea' béadu ca', ne gunna' chiu' ca da guche̱be lazra' guna',

¹⁴da na' guche̱be lazra' ca da gunnía' gate guzúa' lu da sté̱bele̱'e̱.

¹⁵Guzézxea' béadu ca', be̱ dxelanne lau' Lue', ne guna' cuen zren chee̱ zríla'du ca' lau', ne gutia' be̱zre ca', ne chivo biu ca' lau'.

¹⁶Le da, xénele, xúgute̱le dxezrébele Dios, na' guzenda' le'e ca da be̱ne̱' gúcale̱ne̱' neda'.

¹⁷Du lazra' bláwizra' Le̱', ne bca'ana szrénqueza' Le̱'.

¹⁸La guzé̱ lazra' tu da cale̱la, quebe ben Xránadxu chia'.