SALMOS 59:1-16

¹X̱ana' Dios, beslá neda' ḻo na'gak benne' ka' bi ẕḻé'egekle' neda' chawe'. Beslá neda' ḻo na'gak benne' ka' ẕdíḻ-ḻengake' neda'.

²Beslá neda' ḻo na'gak benne' ka' žóngake' da' ẕinnj. Beslá neda' ḻo na'gak benne' wet benách ka'.

³Žénegekle' gótgake' neda'. Zej ndobe benne' waḻe ka' nich tíḻ-ḻengake' neda', kege dan' nbaga'a ẕia, na' kege ni'a che da' ẕinnj da' bena' neda', X̱ana' Dios.

⁴Ḻa'kze bi be bena' chegak benne' ka', žon byéngake' góngake' neda' ẕia. Bebán, na' da ga zoa' ni, na' ḻe'elo' da' žóngake'.

⁵Le', X̱ana', Dios chegak benne' zan ka' žjake' ḻo wdiḻe, na' Dios chegak benne' Israel ka', bebán nich wsaka' zi'o benne' yógo'te yež ka'. Bi yeyache' ḻáže'lo' yógo'te benne' ka' ẕží'igake' chio' Le', na' žóngake' da' ẕinnj.

⁶Ẕḻá'gake' kate' žen wbíž, na ẕbéžeya'agake' ka žongak beko' ka', na' žéchjgekle' yež.

⁷Bwia nga, da' ẕcháḻjgake' naken ka da' žeyébgake'. Diža' ẕnnágake' zej naken ka ya ntoche' ka'. Ẕẕnnágake': “Bi zoa no benne' yenle' chežo.”

⁸San Le', X̱ana' Dios, wẕiẕo' chegak benne' ka'. Gon ditjlo' Le' benne' yógo'te yež ka'.

⁹Benne' ka' bi ẕḻé'egekle' neda' chawe' zej nake' waḻe. Neda' wx̱én ḻaža'a Le', dan' žape chi'o neda'.

¹⁰Dios, Bennen' žeyache' ḻáže'le' neda', yide', na' gákḻene' neda'. Dios gone' ga ḻe'ela' da' gak chegak benne' ka' bi ẕḻé'egekle' neda' chawe' kan žak ḻaža'a.

¹¹Bi goto' benne' ka', nich bi gaḻ ḻáže'gak benne' chia' ka' da' ka' žono'. Besḻás benne' ka' ḻen yeḻa' wak chio', na' ben ga chejchégwgake'. X̱anto' Dios, Le' žape chi'ikzo' neto'.

¹²Ben ga chíx̱gekle' ḻo yeḻa' ẕka'n ẕen kwíngake', ni'a che doḻa' da' žóngake' ḻo da' ẕcháḻjgake', na' ni'a che diža' x̱iwe' ka', na' da' wen ḻaže' da' ẕnnágake'.

¹³Bžia yi' ḻégake' ḻo yeḻa' ẕža'a chio'. Bžia yi' ḻégake' nich biž nníta'gake'. Ben ga gákbe'egekle' Le' ẕnna bi'o ẕa'só Jakob ka'. Ẕnna bi'o dot yežlyó nga.

¹⁴Ẕḻá'gake' kate' žen wbíž, na' ẕbéžeya'agake' ka žongak beko' ka', na' žéchjgekle' yež.

¹⁵Ẕdágake' ka benne' ka' ẕdágakze', žíljgake' da' gáwgake'. Cha' bi žéljgeklen', dot yel žesbága'gake' ẕia toe' yetóe',

¹⁶san neda' goḻkza' che yeḻa' wak chio', na' zildo' wká'n ẕena' yeḻa' žeyache' ḻaže' chio', dan' gókḻeno' Le' neda', na' wdape chi'o neda' kate' wžé' zédḻe'ela'.