SALMOS 50:5-16

⁵Ẕnne': “Le wtób benne' chia' ka', benne' ka' bénḻengake' neda' to diža', dan' bzoa chóchgake' ḻen žen chegak biado' ka'.”

⁶Da' zoan ya'abá ẕḻoe'e ḻawn nak Dios chawe', dan' nake' Benne' wchi'a ḻaže'e benách ka'.

⁷Ẕnne': “Le yenle, benne' chia' ka', na' wchaḻja'. Le wzé nag, benne' Israel ka', na' nnia' da' yesbaga'a ḻe'e ẕia. Neda', Dios, naka' Dios chele.

⁸Bi tiḻa' ḻe'e ni'a chegak biado' ka' betle ḻawa', na' ni'a chegak biado' ka' bzeyle, da' ka' ẕgó'otezele ḻawa' neda'.

⁹Bi si'a beždo ka' ḻo na'le ḻe'e, na' chibo byo ka', bia chele ka'.

¹⁰Yógo'te bia yix̱e' ka' zej nakba' chia', na' yógo'te bia beždo' ka', bia zej zoaba' ḻo ya'ado' ka'.

¹¹Yógo'te bia ka' zoa x̱ílgakba' yó'ogakba' ḻo na'a, na' ḻezka' yógo'te bia ka' zej zoaba' nbángakba'.

¹²Cha' tona' neda', bi yapa' ḻe'e bi da' gonnle chia' dan' yežlyó, na' yógo'te da' zej den ḻawlen zej naken chia'.

¹³¿Žon byenen gawa' x̱péḻa'gak bež ka', cha' ye'ja' žen chegak chibo byo ka'?”

¹⁴Le ko'o ḻaw Dios da' wká'n ẕenle Ḻe', na' le wneẕjw da' wchebe ḻáže'le ḻaw Dios ẕente.

¹⁵Ḻezka' ẕnne': “Bḻiž neda' ḻo ža katen' gak da' wžía yin' benách ka', na' yeslá' le', na' le' gapo' neda' ba la'ne.”

¹⁶Dios ži'e no benne' wen da' ẕinnj: “¿Žeklo' ẕchaḻjo' le' kan nak da' wnnakza' neda', na' ẕnnio' che x̱tiža'a dan' bénḻena' benách chia' ka'?