SALMOS 38:6-19

⁶Ẕda' ẕwia' ḻo yole, dan' žedoe'ela', na' ẕbeže nyacha'a dot ža, na' yele,

⁷dan' dot da' naka' ẕláḻe'en, na' bi zoa chawe' beḻa' žen chia'.

⁸Nat ni'a na'a, na' žekla' zej nžoẕjen žit yoa'a. Ẕbeže ḻaža'a dan' že' zedle yichj ḻáẕda'wa'.

⁹X̱ana' Dios, da' ẕdan ḻaža'a zóaḻenen Le', na' da' ẕbeže ḻaža'a ẕḻé'ekzlo' Le'.

¹⁰Žat ḻáẕda'wa', na' ba bedó ḻaža'a, na' biž ẕḻe'ela' chawe'.

¹¹Žebíga'gak lježa' ka' zíto'le ni'a che yižwé' chia', na' benne' ẕjo'o ḻi'a chia' ka' ba bkwásgake'.

¹²Benne' ka' žénegekle' gótgake' neda' ẕzáḻa'gake' do yeḻj nich senen neda', na' benne' ka' žénegekle' góngake' neda' ẕia ẕnnégake' chia', na' ẕnnágake' kwia yi'a, na' zóatezegake' wsáka'gake' neda',

¹³san neda' bi ženla', kan žak che to benne' kwežw, na' naka' ka to benne' bi žak nne', benne' bi žsaljwe' žoe'e.

¹⁴Naka' ka to benne' bi be ženle', bennen' bi žechebe',

¹⁵dan' žx̱en ḻaža'a Le', X̱ana' Dios. Le' yechebo' ḻo wlaza' neda'.

¹⁶Bi go'o latje yebégekle' ni'a che da' žaken chia'. Kate' chejchegwa', bi go'o ḻégake' latje wká'n ẕen kwíngake' dan' žak nyache' ḻaža'a,

¹⁷san za' chejchegwa', na' ẕláteze dot da' naka'.

¹⁸Che ḻen yex̱óalapa' da' bi nak chawe' da' bena', na' gak nyache' ḻaža'a ni'a che doḻa' da' nbaga'a.

¹⁹Benne' ka' bi ẕḻé'egekle' neda' chawe' zej zoakze' chawe', na' zej nake' waḻe. Zej nyanḻe'e benne' ka' bi ẕḻé'egekle' neda' chawe', na' bi be ẕia bena' ḻégake'.