3Quebe bi chawe' zua be̱la' dxen chia' lawe' da dxezra'u neda', ne quebe zaj zua zrita xu'a cháwedau' lawe' da nuna' dul-la.
4Ca naca da zrinnaj da nuna' ba zria cháqueze na xíchaja'. Zaj naca na chia' ca tu xua' zí'ile̱'e̱.
5We̱' da zaj zria be̱l-la' dxen chia' ba dxelelá na, ne ba dxeluzru na, da na' dxaca chia' lawe' da be̱na' da cale̱la.
6Nucache lawa', ne dxexedué'ele̱'e̱da', ne dxebezre xacha' te zra chizrela,
7lawe' da ca naca be̱l-la' dxen chia' dxelá na, ne quebe bi chawe' zua be̱la' dxen chia'.
8Nate ni'a na'a, ne dxéqueda' ba naxúzrujne zrita xu'a. Dxebezre lazra' lawe' da zua ste̱be lázrdawa'.
9Xran, ca naca da dxezá lazra' zaj zua na nen Lue', na' da dxebezre lazra' dxelé'equeznu' Lue'.
10Dxate̱ lázrdawa', ne ba bedú lazra', ne québedxa dxelé'eda' cháwedau'.
11Dxelexebiga ljwezra', ne le sa' ljwezra' ca' zítu'la ne̱ chee̱ xízrawe̱' chia', na' benne' walízr chia' ba belexecuase̱' zítu'la.
12Benne' ca' dxelaca lazre̱' xelútie̱' neda' dxuluzale̱' xralaj, na' benne' ca' dxelúe lazre̱' bi gaca chia' dxelenné̱' chia' wabía xi'a, ne tu zaj zúaze̱' bi xulusaque̱' neda'.
13Neda' quebe dxenda' ca dxaca chee̱ tu benne' cuezru, ne naca' ca tu benne' quebe dxaca nne̱', benne' quebe dxexrá dxu'e̱.
14Naca' ca tu benne' quebe dxenne̱', bénnea' quebe dxexeche̱be̱',
15lawe' da dxebeza lazra' Lue', Xrana' Dios. Lue' xeche̱bu' waláz chia', Xrana' Dios.
16Gunnia': Quebe gu'u lataj xelebene̱' ne̱ chee̱ da dxaca chia'. Gate dxeajchazia', quebe gu'u le̱' lataj xulucá'ana szren cuine̱' lawe' da zua' lu da baxache'.
17Ba zua' cheajcházia', ne tu dxelázqueze dute̱ be̱l-la' dxen chia'.
18Chee̱ le̱ na' xrúale̱pequeza' da cale̱la da be̱na', ne xewine lazra' ca naca dul-la da nabaga'.
19Benne' ca' dxeledábague̱' neda' zaj zúaqueze̱' chawe', ne zaj naque̱' benne' wal-la. Zaj naxánle̱'e̱ benne' ca' dxelecuídene̱' neda', ne quebe bi de̱ da dxagu na zria chia' lau le̱'.
20Benne' ca' dxelune̱' da cale̱la chee̱ benne' ca' dxelune̱' da xrlátaje zaj naque̱' benne' dxeledábague̱' neda' lawe' da tu dxúnzqueza' da xrlátaje.
21Quebe gusanu' neda', Xrana' Dios. Dios chia', quebe su' zitu' naga zua'.
22Be̱n ba xuzre gácale̱nu' neda', Xran. Nacu' Benne' dxuselé̱' neda'.