Salmos 36:1-10

¹Da zrinnaj da dxun benne' dxuzúa chalá'ala Dios dxuchálajle̱ na le̱' lu xichaj lázrdawe̱'. Quebe dxezá lázrequeze̱' gape̱' Dios ba lá'ana.

²Chee̱ le̱ na' dxulé'e cuine̱' ca tu benne' zrente̱. Dxéquene̱' quebe dxelé'e Dios da zrinnaj da dxune̱', ne quebe dxecuide Dios le̱'.

³Da tu dxuchálajzqueze̱' naca na da zrinnaj, ne da we̱n lazre'. Québedxa dxéajni'ine̱', ne québedxa dxune̱' da xrlátaje.

⁴Dxulaba lazre̱' ca naca da cale̱la gune̱' gate de̱' naga dxate'. Xu'e̱ neza da quebe naca neza chawe'. Quebe dxecuídene̱' da cale̱la.

⁵Xrana' Dios, zrente̱ naca xel-la' dxexache lazre' chiu' da dxezrinte̱ na xabáa, na' dxezrinte̱ lu beuj xel-la' li lazre' chiu'.

⁶Da xrlátaje chiu' naca na ca tu xi'a zren chiu', na' ca dxuchi'u naca na ca tu nísadau' sítujte̱. Xrana' Dios, tu dxuxúezquezu' bénneache, ne be̱ xixre' ca'.

⁷Xrdante̱ naca xel-la' dxexache lazre' chiu', Dios. Chee̱ le̱ na' dxuluxrén lazre' bénneache Lue' ca dxelún bedxuj dxé'enedu ca' dxelexezraba' zran xrila bedxuj.

⁸Welélajquezne̱' chee̱ da de̱le̱'e̱ lizru', na' Lue' gunézruju' xelé'aje̱' da naca ca tu xe̱gu da naca na da dxezaca ba lazru' Lue'.

⁹Naga zu' Lue' zua beaj naga dxalaj nisa da dxunna na xel-la' nabán. Lu xel-la' naxaní' chiu' walé'entu' da naca lení'.

¹⁰Bexache lazre' benne' ca' zaj núnbe'e̱ Lue', ne bzua chee̱ benne' li lazre' ca' da xrlátaje chiu'.