SALMOS 31:2-14

²Bze nag chi'a, na' gokḻen neda'. Bze choch neda', na' wdape chi'i neda' nich yelá'.

³Le' ẕzoa chochkzo' neda', na' žape chi'o neda'. Dan' nako' ḻi ḻaže' wḻoe'elo' neda' nez, na' wgó'o neda' nezen'.

⁴Bebéj neda' ḻo do yeḻj dan' bkwézgake' nich séngake' neda'. Le', X̱an, ẕwíakzo' neda'.

⁵Ẕdia' be' da' nakkza' ḻo no'o Le', X̱ana' Dios. Le' beya'wo' neda', Dios ḻi ḻaže'.

⁶Bi de chawa'a benne' ka' ẕka'n ẕéngake' lo'a ka', san neda' žx̱en ḻaža'a Le', X̱ana' Dios.

⁷Yebéḻe'ela', na' soa' chawe' dan' nži'ilo' neda' na' ẕḻe'ekzlo' ẕzáka'ḻi'a. Nnezlo' ka ẕdia' ḻo da' žsáka'ḻe'egake' neda'.

⁸Bi bdio' neda' ḻo na'gak benne' ka' ẕžá'agake' neda'. Bzoa chocho' neda' to latje chawe'.

⁹Beyache' ḻaže'l neda', X̱ana' Dios, dan' ẕzáka'ḻi'a. Ba bebíž nis da' yožen yej ḻawa', na' žak nyache' ḻaža'a ḻo be' da' nakkza', na' ḻo beḻa' žen chia'.

¹⁰Dan' ẕde yeḻa' nban chia' ḻo da' ẕzáka'ḻi'a, ẕdia' yiz chia' ka' ẕbeže ḻaža'a, na' žedó ḻaža'a dan' nbaga'a ẕia, na' ẕlagak žit yoa'a.

¹¹Benne' ka' ẕžá'agake' neda' gon dítjgekle' neda', na' benne' ẕjo'o ḻi'a chia' ka' žon dítjgekle' neda'. Benne' ka' zej nónbi'e neda' ẕkwásgake' gan zoa', na' benne' ka' ẕḻé'egekle' neda' ḻo nez žẕónnjgake'.

¹²Goḻ ḻáže'gake' neda' ka žóngake' che to benne' gat. Naka' neda' ka to ye'n yo da' nla'an.

¹³Ženla' da' ẕnnegak benne' zante chia', na' gáte'teze zoa da' ẕcheben neda' dan' žóngake' toze diža' bi da' góngake' chia', na' žak ḻáže'gake' gótgake' neda',

¹⁴san neda' žx̱en ḻaža'a Le', X̱ana' Dios. Ẕnnia' nako' Le' Dios chia'.