Salmos 27:5-14

⁵Ashiri, Apaa, yutaritshish nuwash kuskachu, shiysha nuwaa shaanshu pangish wayakchush, nuwsha anush kamungchina. Ashkachush nuwaa tapachindachsha.

⁶Shiyamun wizpurirish kundarareetsi kasichina. Ashiri shiyaatssha, Wapparee, aturi, chinuzee pachayaruri muchchina. Mucheeruri, kapung mangi ksakuri, yaseessheetssha yasichina.

⁷Apaa, shiyaa kuruzki anoo mazinangandama. Shiysha nuwaa nayanikush, kamaninganda.

⁸Nuw Apanlli mashkuri mangishi; Apaa, nuwaa istanda, atina. Ashirucha nuwsha Apaa, shiyaa, Istanda, áti.

⁹Apaa, shiysha nuwaa tpishishpa. Tsiyantayarush, nuwaa niyrishpa. Watam shiyamari nuwaa istakush taakshawa. Ashiri nuwaa ksarishpa. Istangandama. Tputs nllitari nuwaa istamaam wanindaja. Shiyamari nuwaa tapachindakush taaksha, Apaa.

¹⁰Wandtaati apari, aneertamti nda nuwaa ksutkusin, itaru shiysha Apaa, urutari nuwaam ksutamapaniri taaksha.

¹¹Mishat, Apaa, nda kundarari nuwaa tayutaritamaam, shiysha nungipish machinda. Itsinsaru shiyashumari tachitpi túri, atina.

¹²Yutaritshishpan tputs nuwaa ksirundama. Ksarishpa. Watam nuwaa kapung natsakanawa. Nuwaa mangu ngicheersin, mantsir tsiyatkanaya.

¹³Itaru, Apaa, nuw shiyaa yasaktana. shiy nuwaa chinakush, urutamari istakush taaksha; Ayamtaati kasacheezish, ndambaree.

¹⁴Ashiri siysa Apanllchichis, Apanllimun mangis tatungtsa. Kizpur taangtsa. Sambaytarintspa, Izuuru Apanllimun mangis tatungtsa, atina.