Salmos 21:4-13

⁴Gunabe̱' Lue' gunnu' le̱' xel-la' nabán, na' bnézruju' na le̱' chee̱ súaqueze̱' zane' iza.

⁵Zrente̱ naca xabáa chee̱' lawe' da bseláu' le̱'. Be̱nnu' le̱' xel-la' ba lá'ana, ne xel-la' szren.

⁶Lawe' da nunu' gaca chawe' chee̱' chadía chacanna dxunu' dxebéle̱'e̱ne̱' lau Lue'.

⁷Lawe' da dxuxrén lazre' wenná bea na' Xránadxu, xexache lazre' Dios szrente̱ le̱', na' quebe sue̱' lu da ste̱be.

⁸Xulétaju' xúgute̱ benne' dxeledábague̱' lue'. Xel-la' waca chiu' xulétaju' benne' ca' dxelecuídene̱' lue'.

⁹Lu zra na' zra'u le̱' gaca chee̱ benne' ca' ca guzú' le̱' lu xi' ga dxulúzrie̱' bla'dau'. Xránadxu guzúzruje̱' benne' ca' lu xel-la' dxezrá'a chee̱', na' xi' na' guzezxe na le̱'.

¹⁰Xúgute̱ da belune̱' lu xe̱zr la xu nigá guzria xi'u, ne xegú' zri'ine zre sue̱' ládujla bénneache,

¹¹lawe' da gulaca lazre̱' xelune̱' da cale̱la chiu' Lue'. Gulilaj lazre̱' ca da xelune̱', san quebe bi xelezéquene̱',

¹²lawe' da gulagu' benne' ca'. Nucuezu' xaga nalá xéche'ze chiu' chee̱ le̱'.

¹³Begá'ana szrénqueze Lue', Xran, lu xel-la' wal-la chiu'. Tu gúl-lazquezdxu, ne tu güe lá'anazquezdxu Lue' ca naca xel-la' waca chiu'.