SALMOS 18:7-29 - Dižaʼ chaweʼ kub len Salmo kaʼ

SALMOS 18:7-29

Click on verse(s) to share them!

⁷Naž wẕó' yežlyó nga. Wẕízegak ya'a ka' gže'. Wẕízeḻe'egaken dan' bže'e Ḻe'.

⁸Bžoj žen che yi' ḻo ẕine'e, na' bžoj yi' ḻo žoe'e da' bzeyen da' zej že' ḻawe', na' yi' na' bẕenen bzio' yi' ka'.

⁹Bsaljwe' ya'abá, na' betje', na' wzóa da' choḻ ẕan ni'e.

¹⁰Wdíe' ḻo be', ne ži'e to da' nzin' kerubín. Ka' gaze wdíe' ḻo be' bdone'.

¹¹Gokwe' da' choḻ, dan' bkachen' Ḻe', dan' naken bejw gasj da' yožen nis.

¹²Ḻo da' žákti'teḻe'e chie' bžojgak bejw gasj ka'. Bžojgak wzió' yi', na' yej nis.

¹³Ẕan ya'abá wnné wzió' che chi'i X̱anžo Dios, na' benle chi'i Dios ẕente ládjwgak wzió' yi' ka', na' yej nisen'.

¹⁴Bsie' yag ntóche'do' chie' ka', na' besḻase' benne' ka' bi ẕḻé'egekle' neda' chawe'. Bsane' yes wzió' ka', na' bžia yi'e benne' ka'.

¹⁵Naž bḻa' ḻawgak da' ka' zej že' gže' ẕan nisdo', na' bḻa' ḻaw x̱ni'a yežlyó dan' žen' ẕan nisdon'. Bdiḻo' benne' ka' ẕžá'agake' neda', X̱ana' Dios, na' ḻo yeḻa' ẕža'a chio' bsejo' x̱nézgake'.

¹⁶Betj Dios ḻo da' sibe, na' bex̱we' neda', na' ḻen ne'e waḻe bebeje' neda' ḻo da' zede da' goken ka nis zil.

¹⁷Beslé' neda' ḻo na'gak benne' waḻe ka', benne' bi ẕḻé'egekle' neda' chawe', na' ḻo na'gak benne' ka' ẕží'igake' chia' neda', benne' ka' zej nakže' waḻe ka neda'.

¹⁸Bdíḻ-ḻengake' neda' katen' wzóa' ḻo da' zedḻe'e, san X̱ana' Dios gókḻene' neda'.

¹⁹Bebeje' neda' gan wyoá'a, na' bzoe' neda' to latje ẕen. Beslé' neda' dan' wyáz ḻaže'e neda'.

²⁰X̱anžo Dios bebi'e chia' dan' bena' da' naken chawe', na' ka nakkze da' chawen' bebi'e chia',

²¹dan' žona' ka žsedle X̱ana' neda', na' bi wléj yichja' Dios chia'.

²²Žona' ka nak da' bchi'le' žo'o, na' bi bsana' diža' ka' da' bdix̱jwe'.

²³Goka' ḻi ḻaže' ḻawe' Ḻe', na' wdape chi'i kwina' nich bi gona' da' ẕinnj.

²⁴Bebí'i X̱anžo Dios chia' ka nak da' chawe' da' bena', ka nakkze da' chawen' dan' bena' ḻawe' Ḻe'.

²⁵Žeyache' ḻáže'lo' no benne' žeyache' ḻáže'le' lježe', na' nako' ḻi ḻaže' ḻen bennen' nake' ḻi ḻaže'.

²⁶Ẕcháḻjḻeno' benne' chawen' da' naken dot chawe', na' gako' snia ḻen benne' wen da' ẕinnj.

²⁷Yesló' benne' chawen' ḻo da' wžía yin' benách ka', san wzex̱jo' benne' ka' ẕka'n ẕen kwíngake'.

²⁸Le' wzaljo' yi' chia'. Le', X̱ana' Dios, wza'ni'o chia' gan zoa' ḻo da' choḻ.

²⁹Yeḻa' wak chio' wžía yin' benne' zanḻe'e, benne' ka' žjake' ḻo wdiḻe. Cha' Le', Dios, sóaḻeno' neda', wak wchinnja' ze'e ka' žape chí'igaken yež ka'.