Salmos 16:1-8

¹Bxue neda', Dios, lawe' da dxuxrén lazra' Lue'.

²Lu xichaj lázrdawa' gucha' Xrana' Dios: “Lue' nacu' Xrana'. Quebe bi xetú da xrlátaje de̱ chia' da quebe naca na chiu'.”

³Tuze benne' ca' zaj naque̱' chee̱ Dios lu xe̱zr la xu, ne benne' ca' zaj naque̱' du lazre' dxezaca ba lázrele̱na'.

⁴Waxánqueze da dxelezaca benne' ca' dxelape̱' ba lá'ana tu dios quebe bi zaca. Quebe guna' le̱' tu zren gate dxuluzríe̱' zren lau dios na', ne quebe guchíneda' la dios na'.

⁵Xránadxu Dios dxugawe̱' neda', ne naque̱' da ba neza chia'. Lue', Dios, nuxru' ca da naca chia'.

⁶Ca da nuzú' chia' zaj naca na da dxezi'a ba neza, ne xrtante̱ zaj naca da nunnu' chia'.

⁷Tu gucá'ana szrénzqueza' Xránadxu Dios, Bénnea' dxusé̱dene̱' neda'. Chizrela gate ne dxasia' dxuzéajni'ine̱' neda' lu xichaj lázrdawa'.

⁸Xránadxu Dios nuxrén lazra' gusi'e̱ neda'. Lawe' da zue̱' cuita', quebe bi seque' guchebe na neda'.