SALMOS 132:9-17

⁹Ben ga gongak bx̱oz chio' ka' da' naken chawe', na' kwéžeya'a yógo'te benách chio' ka' ḻo yeḻa' žebele chégake'.

¹⁰Dan' nži'ilo' Dabí, wen žin chio', bi wzó' cheḻa'ale benne' wnná bian' wžío' Le'.

¹¹Da' likze bzetj kwin X̱anžo Dios, na' bchebe ḻaže'e bi da' gone' che Dabí, na' bi wnite' dan' wnné' gone'. Wnné': “Gona' ga nna bia'gak ẕa'só' ka' gan ẕnna bia'kzo' le'.

¹²Cha' góntezegak ẕi'no' ka' ka nak x̱tiža'a dan' bénḻena' le', na' ka nak x̱tiža'a dan' wsedla' le', na' ẕi'no' ka' nna biá'tezegake' gan ẕnna bi'o le'.”

¹³Dan' wžé X̱anžo Dios yež Sión gok ḻaže'e soa ližkze' ga na',

¹⁴na' wnné': “Gákteze latje nga gan soakza' neda'. Sóateza' nga dan' ki žaz ḻaža'a gona'.

¹⁵Gona' gáta'ḻe'e linne chegak benne' ka'. Gona' ga yéljgekle benne' yache' ka' yet.

¹⁶Gona' ga gongak bx̱oz chia' ka' da' naken chawe'. Kwéžeya'a yógo'te benách chia' ka' ḻo yeḻa' žebele.

¹⁷Ḻo latjen' gona' ga yeyák yeḻa' wnná bia' che Dabí. Gona' ga soagak nbangak ẕa'só benne' wnná bian' ga na', bennen' wžía' neda'.