Salmos 119:99-109

⁹⁹Kamachtamareetish uru chinachintar ashkuri, mayistorootstaa kasiru mangoonkitamana.

¹⁰⁰Tputsee wachinawaatstaa, kasiru mangoonkitamana, watam shiyaa kukish tuminkinawa.

¹⁰¹Shiyaa kukish izuuru mangipti payupi aturi, yutaritshishireetsi izuuru kasarangina.

¹⁰²Shiy shaana Apaa nuwaa tayaspataksha. Ashiriya, shiyaa kukish kasacheezi, ndambaree.

¹⁰³Watam shiy chinashish kizpur wanasircha. Mishat, kama kinduraa wayar waakuch, kizpur kisa an tamapari ashiriya nuwaama shiy kukish. Shiyamun kukish mangi kisa.

¹⁰⁴Shiy kukish nuwaa itsinsaru chinamaam tayapstakiya. Ashiri tputs yutarit taaku an nuwaam kizpur yutarita.

¹⁰⁵Shiy kukish mbarinpaz ashiru shiyaa itsinsaru tachitamaam ktsishtamti naamaam tuwasineekiya.

¹⁰⁶Shiyaa Apaa, sirú tárangina: Shiy kukish wanasirimishcha. Ashiri izuuru payuchima, táranguri, anoomari chinakina.

¹⁰⁷Apaa, kapung kiyung kachiykina. Itaru shiysha, Nuw uru ksutchinllpa, tárangsha. Ashiri taarasheetsi ksutanda, Apaa.

¹⁰⁸Shiyaa ungirtakuri, shiysha nuwaa kuki kis mazinangcha. Shiy uru nuwaa itsinsaru tayaspataksha. Ashiri mangeetsi p'tseengcha, mangipti taamaama.

¹⁰⁹Yutaritshishpan tputs nuwaa pachamaam zandkusin, uru nuwash xarashish wayakanaya. Itaru, nuwsha shiyamun kukish mangi tatkina. Kasacheezi, ndambaree.