SALMOS 119:87-146

⁸⁷Yeláte'ze bétgake' neda', san bi na' wsana' gona' da' wnnakzo' Le'.

⁸⁸Ḻo yeḻa' žeyache' ḻaže' chio' ben choch yichj ḻáẕda'wa', nich gónteza' ka žsedle diža' chio' neto'.

⁸⁹X̱ana' Dios, to chi'ize zoa x̱tižo'o ya'abá na'le.

⁹⁰Yeḻa' ḻi ḻaže' chio' žinen chegak yógo'te kwe' benách ka'. Le' bzoa chochkzo' yežlyó, na' zoakzen.

⁹¹Ni'a che da' wnnakzo' zej nnita' yógo'te da' zej de, na' yógo'ten žóngaken žin chio'.

⁹²Chela' bi wyáz ḻaža'a da' wnnakzo' Le' bache wnitla' ni'a che da' wẕáka'ḻi'a.

⁹³Batkle gaḻ ḻaža'a da' bchi'lo' neto', dan' ni'a chen ba ben chocho' neda'.

⁹⁴Beslá neda' dan' naka' neda' chio' Le' na' žon byena' gona' kan ẕnna x̱tižo'o.

⁹⁵Benne' wen da' ẕinnj ka' bwíagake' neda' nich gak wžía yí'gake' neda', san neda' ẕlab ḻaža'a da' žsedle diža' chio' neto'.

⁹⁶Ba bḻe'ekzla' ẕde chegak yógo'te da' zej de yežlyó, san da' ka' wnnakzo' Le' batkle te chégaken.

⁹⁷Dios, nží'iḻe'ela' da' žsedlo' neto'. Dot ža ẕlab ḻaža'a ka ẕnnan.

⁹⁸Ni'a che da' bchi'lo' neto', beno' ga žejní'ižela' ka benne' ka' ẕžá'agake' neda' dan' zóaḻenteze da' wnnakzo' neda'.

⁹⁹Žejní'ižela' ka benne' ka' žsédgekle' neda' dan' ẕlab ḻaža'a da' žsedle diža' chio' neda'.

¹⁰⁰Ba žejní'ižela' ka benne' gole ka' dan' žónteza' ka ẕnna da' bchi'lo' Le' neto'.

¹⁰¹Ben byena' bi be gona' da' bi nak chawe', nich gónteza' ka ẕnna x̱tižo'o.

¹⁰²Bi bsana' žona' kan bchi'a ḻažo'o dan' bsedlo' Le' neda'.

¹⁰³X̱tižo'o naken ka to da' ẕix̱ḻe'e ḻo žoa'a. Nakžen ẕix̱ ka nak da' ẕix̱ che bez ḻo žoa'a.

¹⁰⁴Ni'a che da' wnnakzo' Le' naka' benne' sina'. Che ḻen bi ẕḻe'ela' chawe' yógo'te da' wen ḻaže'.

¹⁰⁵Ka to yi' nak x̱tižo'o gan ẕda', dan' žsa'nín' nez da' ẕzá'ḻena'.

¹⁰⁶Bzetja' La la'y chio', Dios, na' bchebe ḻaža'a gónteza' ka bchi'a ḻažo'o da' naken chawe'.

¹⁰⁷X̱ana' Dios, ẕzáka'ḻi'a. Ben choch neda' káteze bchebe ḻažo'o gono'.

¹⁰⁸X̱ana' Dios, žáta'yoela' Le' si'o da' žoe ḻawa' Le'. Bsedle neda' gona' ka bchi'a ḻažo'o.

¹⁰⁹Že' zédtezla' dan' zoa' gata', na' bi na' gaḻ ḻaža'a gona' da' wnnakzo' Le'.

¹¹⁰Benne' wen da' ẕinnj ka' bzáljgake' do yeḻj nich senen neda', san neda' bi bsana' žona' da' bchi'lo' Le' neto'.

¹¹¹Ba wžía' da' žsedle x̱tižo'o neda' nich gaken da' gápekza' to chi'ize, dan' nak x̱tižo'o da' ẕdan ḻáže'ḻi'a.

¹¹²Zoakze ḻáẕda'wa' gónteza' ka ẕnna x̱tižo'o na' zejte ža gata'.

¹¹³Bi ẕḻe'ela' chawe' benne' ka' ẕḻoé'ezele kwíngake' chawe', san nži'ila' da' wnnakzo' Le'.

¹¹⁴Nako' Le' ka to yo'o gan ẕga'na' chawe', na' ka to da' žape chi'in neda', dan' žx̱en ḻaža'a gaken ka ẕnna x̱tižo'o.

¹¹⁵Le kwas gan zoa', ḻe'e, benne' wen da' ẕinnj ka', dan' gónteza' ka bchi'le Dios chia' neto'.

¹¹⁶Ben choch neda' káteze ẕnna x̱tižo'o, na' soa' nbana', na' bi yedoe'ela' ni'a che dan' žx̱en ḻaža'a.

¹¹⁷Ben choch neda', na' la', na' chaz ḻáže'teza' x̱tižo'o.

¹¹⁸Blej bchochj yógo'te benne' ka' bi žóngake' kan ẕnna x̱tižo'o dan' nak yeḻa' žejní'il chégake' da' wen ḻaže'.

¹¹⁹Yógo'te benne' wen da' ẕinnj ka' zej nake' ka bebe ḻo yežlyó nga. Che ḻen nži'ila' da' žsedle diža' chio' neto'.

¹²⁰Žẕize beḻa' žen chia' dan' ẕžeba' Le', san žapa' ba la'ne da' ẕchi'a ḻažo'o, da' naken chawe'.

¹²¹Žona' ka nak da' bchi'a ḻažo'o, da' naken chawe'. Bi wdío' neda' ḻo na'gak benne' ka' žsaka' zí'gake' neda'.

¹²²Bchebe ḻažo'o chia' gon chawo'o neda'. Bi go'o latje benne' ka' ẕka'n ẕen kwíngake' wsaka' zí'gake' neda'.

¹²³Gok yej ḻawa' dan' ẕbeza' yido' yesló' neda', na' wchi'a ḻažo'o neto' kan ẕnna x̱tižo'o.

¹²⁴Ḻo yeḻa' žeyache' ḻaže' chio' ben chawe' neda', wen žin chio', na' bsedle neda' gona' ka ẕnna x̱tižo'o.

¹²⁵Bzejní'il neda', wen žin chio', nich gónbi'a da' žsedle diža' chio' neto'.

¹²⁶X̱ana' Dios, ba bžin ža bi da' gono', dan' bzóagake' cheḻa'ale da' wnnakzo' Le'.

¹²⁷Che ḻen neda' nží'ižela' da' bchi'lo' neto', ka ya oro, na' ka da' záka'že ka ya oron'.

¹²⁸Che ḻen žekla' záka'že da' wnnó' ka yógo'te da' de, na' bi ẕḻe'ela' chawe' yógo'te da' zej naken da' wen laže'.

¹²⁹Žebanlto' ka žsedle diža' chio' neto'. Che ḻen dot ḻaža'a žónteza' ka ẕnnan.

¹³⁰Kate' no benne' bi gak chejni'ile' x̱tižo'o, x̱tižo'o na'kze žsa'nín' ḻe'. Ẕzejni'ilen benne' gax̱jw ḻaže' ka'.

¹³¹Wsalja' žoa'a, na' kwez ḻaža'a dan' žak ḻaža'a gónbi'a da' wnnakzo' Le'.

¹³²Bwia neda', na' beyache' ḻaže'l neda', kan žóntezo' chegak benne' ka' zej nži'ile' Le'.

¹³³Ben ga gónteza' ka ẕnna x̱tižo'o, na' bi go'o latje da' ẕinnj nna bian' neda'.

¹³⁴Beslá neda' ḻo na'gak benne' yichj ža'a ka', na' gónteza' ka nak da' bchi'lo' neto'.

¹³⁵Ben chawe' neda', wen žin chio', na' bsedle neda' gona' ka ẕnna x̱tižo'o.

¹³⁶Nis wžeža' goken ka to yegw nis dan' bi žongak benne' ka' da' wnnakzo' Le'.

¹³⁷X̱ana' Dios, chawe' nako' Le', na' ḻi ḻaže' nak ka ẕchi'a ḻažo'o neto'.

¹³⁸Da' žsedle diža' chio' neto', dan' bdion' ḻo na'to', naken da' li, na' ḻi ḻaže'.

¹³⁹Žedó ḻaža'a dan' žé'ḻi'a wnné yoe dan' goḻ ḻáže'gak benne' ka' bi ẕḻé'egekle' neda' chawe' ka ẕnna x̱tižo'o.

¹⁴⁰Dot da' li nak x̱tižo'o, na' neda', wen žin chio', nži'ilan'.

¹⁴¹Naka' gax̱jw ḻaže', na' ẕzóagake' neda' cheḻa'ale, san bi na' gaḻ ḻaža'a da' wnnakzo' Le'.

¹⁴²To chi'ize zoa da' ẕchi'a ḻažo'o, na' da' li nak da' bchi'lo' neto'.

¹⁴³Da' ẕzáka'ḻi'a, na' da' zede zej nox̱en neda', san žaz ḻaža'a da' wnnakzo' Le'.

¹⁴⁴To chi'ize nak ḻi ḻaže' da' žsedle diža' chio' neto'. Bzejní'il neda', na' soa' nbana'.

¹⁴⁵Dot ḻaža'a žḻiža' Le', X̱ana' Dios. Ben chawe' neda', na' gónteza' ka ẕnna x̱tižo'o.

¹⁴⁶Žḻiža' Le'. Gokḻen neda', na' gónteza' ka žsedle diža' chio' neto'.