Salmos 119:78-81

⁷⁸Be̱n xelexedué'e benne' ca' dxulucá'ana szren cuina lawe' da gulenné̱' schanni' chia', ne quebe bi bena' chee̱'. Neda' gulaba lazra' ca da bdxixruj be'u.

⁷⁹Be̱n xelexelá' benne' ca' dxelezrebe̱' Lue', chee̱ xelenne̱' chia', na' xulusé̱die̱' da dxuse̱de dizra' chiu' netu'.

⁸⁰Be̱n gaca' du lazre' ca naca xrba chiu' chee̱ québequeze xedué'eda'.

⁸¹Zua bénne'du xu'a lu da ste̱be lawe' da dxebeza' xidu' guseláu' neda', na' dxebeza lazra' gaca ca dxenná xrtizru'.