Salmos 119:64-69

⁶⁴Xrana' Dios, dxezrín dute̱ xe̱zr la xu xel-la' dxexache lazre' chiu'. Bse̱de neda' chee̱ guna' ca dxenná xrba chiu'.

⁶⁵Ba be̱nu' guca chawe' chia' neda', we̱n zrin chiu'. Xran, be̱nu' na cáte̱ze dxenná xrtizru'.

⁶⁶Bse̱de neda' chee̱ gueque be'eda' da naca xrlátaje, ne chee̱ chéajni'ida' lawe' da dxéajle̱'a da bdxixruj be'u.

⁶⁷Nédxula ca bzéxruju' neda' gudéa' chalá'ala, na' na'a tu dxúnzqueza' ca dxenná xrtizru'.

⁶⁸Nacu' xrlátaje, ne dxunu' gaca chawe' chee̱ntu'. Bse̱de neda' guna' ca naca xrba chiu'.

⁶⁹Benne' dxulucá'ana szren cuine̱' gulenné̱' chia' da we̱n lazre' san dute̱ lázrdawa' tu gúnzqueza' ca bdxixruj be'u.