SALMOS 119:48-130

⁴⁸Žechebe ḻaža'a gona' da' bchi'lo' neto', dan' nži'ila', na' wláb ḻaža'a ka ẕnna x̱tižo'o.

⁴⁹Bejsá' ḻaže' da' wchebe ḻažo'o chia' neda', wen žin chio', dan' žx̱en ḻaža'an.

⁵⁰Katen' wẕáka'ḻi'a, wzóa to da' beyón ẕenen neda', dan' ben choch x̱tižo'o yichj ḻáẕda'wa'.

⁵¹Benne' ka' ẕka'n ẕen kwíngake' ẕnnégake' chia', san batkle wsana' da' wnnakzo' Le'.

⁵²Chejsá' ḻaža'a ka nak da' bchi'a ḻažo'o ža ni'te, dan' žeyón ẕenen neda', X̱ana' Dios.

⁵³Ẕža'a neda', na že' zedla' ni'a chegak benne' ka' žóngake' da' ẕinnj, benne' ka' ẕzóagake' cheḻa'ale da' wnnakzo' Le'.

⁵⁴X̱tižo'o naken to da' žoḻa' kate' ne zoa' to yežlyó da' žen' zi'to' ga zoa laža'.

⁵⁵Žel chejsá' ḻaža'a La la'y chio', X̱ana' Dios, na' gónteza' ka ẕnna da' wnnakzo' Le'.

⁵⁶Gaken yeḻa' ba nez ẕen chia' dan' gónteza' da' bchi'lo' Le' neto'.

⁵⁷Da' ẕdan ḻaža'a nakkzo' Le', X̱ana' Dios. Wnnakza' gónteza' ka ẕnna x̱tižo'o.

⁵⁸Dot ḻaža'a ẕnnabla' Le' yido' gákḻeno' neda'. Beyache' ḻaže'l neda' kan wnnakzo' gono'.

⁵⁹Bwia' binlo ka zej nak da' ka' bena', na' da' yoble žona' ka žsedle diža' chio' neto'.

⁶⁰Ben byena', na' bi wžeḻ-la' gónteza' ka nak da' wnnakzo' Le'.

⁶¹Do yeḻj chegak benne' wen da' ẕinnj ka' nžejen neda', san bi na' gaḻ ḻaža'a ka ẕnna da' bchi'lo' neto'.

⁶²Žel žeyasa' na' ẕka'n ẕena' Le' dan' chawe' nak da' ẕchi'a ḻažo'o.

⁶³Naka' toze ḻen yógo'te benne' ka' ẕžébegake' Le', benne' ka' žóntezgake' ka nak da' wnnakzo' Le'.

⁶⁴X̱ana' Dios, nža' yežlyó yeḻa' žeyache' ḻaže' chio'. Bsedle neda' gona' ka ẕnna x̱tižo'o.

⁶⁵Žon chawo'o neda', wen žin chio'. X̱ana' Dios, žonon' ka ẕnnakze x̱tižo'o.

⁶⁶Bsedle neda' da' nak chawe' nich chejni'ilan', dan' žejḻi'a da' wnnakzo' Le'.

⁶⁷Néžwte ka bzex̱jo' neda' wdía' cheḻa'ale, san na'a žónteza' ka ẕnna x̱tižo'o.

⁶⁸Nako' chawe', na' ẕnno' gon chawo'o neto'. Bsedle neda' nich gona' ka ẕnna x̱tižo'o.

⁶⁹Benne' ka' ẕka'n ẕen kwíngake' wnnégake' chia' da' wen ḻaže', san dot ḻaža'a gónteza' da' bchi'lo' neto'.

⁷⁰Bi yo'o yeḻa' žejní'il ḻo ḻáẕdo'gak benne' ka' san neda' žaz ḻaža'a gona' da' wnnakzo' Le'.

⁷¹Chawe' nak bzex̱jo' neda', nich wsedla' gona' ka ẕnna x̱tižo'o.

⁷²Nákḻe'eže chawe' da' bchi'lo' neda', ka zante mil mežw oro, na' plat.

⁷³Ḻen na'kzo' beno' neda' káteze naka'. Bzejní'il neda' nich wsedla' gona' da' wnnakzo' Le'.

⁷⁴Benne' ka' ẕžébegake' Le' ḻé'egekle' neda', na' yebégekle' dan' žx̱en ḻaža'a gak kan ẕnna x̱tižo'o.

⁷⁵X̱ana' Dios, nnezla' nak chawe' kan ẕchi'a ḻažo'o, na' ḻo yeḻa' ḻi ḻaže' chio' bsaka' zi'o neda'.

⁷⁶Na'a ḻo yeḻa' žeyache' ḻaže' chio' beyón ẕen neda' káteze nak da' bchebe ḻažo'o gono' chia' neda', wen žin chio'.

⁷⁷Beyache' ḻaže'l neda' nich soa' nbana' dan' žaz ḻaža'a gona' da' wnnakzo' Le'.

⁷⁸Ben ga yedoé'egekle benne' ka' ẕka'n ẕen kwíngake', dan' ẕnnégake' chia', na' bi be bena' chégake', san neda' wláb ḻaža'a ka nak da' bchi'lo' Le' neto'.

⁷⁹Ben ga ḻa'gak benne' ka' ẕžébegake' Le', nich yéngekle' chia', na' wsédgekle' da' žsedle diža' chio' neto'.

⁸⁰Ben ga gona' dot ḻaža'a ka ẕnna x̱tižo'o, nich batkle yedoe'ela'.

⁸¹Že' zedle be' da' nakkza' dan' ẕbeza' ža yido' yesló' neda'. Žx̱en ḻaža'a gaken kan ẕnna x̱tižo'o.

⁸²Že' bxin yej ḻawa' dan' žénela' yenla' da' nno', na' ẕnnia': ¿Batx̱kze yeyón ẕeno' neda'?

⁸³Ẕbiža' ka to že'e yid dan' naḻan' ḻaw yi', san bi na' gaḻ ḻaža'a gona' ka ẕnna x̱tižo'o.

⁸⁴¿Balx̱ ža soa' nbana' neda', wen žin chio'? ¿Batx̱kze gono' zi' benne' ka' ẕbia ḻáže'gake' neda'?

⁸⁵Benne' ka' ẕka'n ẕen kwíngake' bché'ngake' to yežw gan chejbix̱a' neda'. Batkle žóngake' ka ẕnna dan' wnnakzo' Le'.

⁸⁶Yógo'te da' bchi'lo' Le' neto' naken dot da' li. Gokḻen neda' dan' ẕbia ḻáže'gake' neda', na' bi be bena' chégake'.

⁸⁷Yeláte'ze bétgake' neda', san bi na' wsana' gona' da' wnnakzo' Le'.

⁸⁸Ḻo yeḻa' žeyache' ḻaže' chio' ben choch yichj ḻáẕda'wa', nich gónteza' ka žsedle diža' chio' neto'.

⁸⁹X̱ana' Dios, to chi'ize zoa x̱tižo'o ya'abá na'le.

⁹⁰Yeḻa' ḻi ḻaže' chio' žinen chegak yógo'te kwe' benách ka'. Le' bzoa chochkzo' yežlyó, na' zoakzen.

⁹¹Ni'a che da' wnnakzo' zej nnita' yógo'te da' zej de, na' yógo'ten žóngaken žin chio'.

⁹²Chela' bi wyáz ḻaža'a da' wnnakzo' Le' bache wnitla' ni'a che da' wẕáka'ḻi'a.

⁹³Batkle gaḻ ḻaža'a da' bchi'lo' neto', dan' ni'a chen ba ben chocho' neda'.

⁹⁴Beslá neda' dan' naka' neda' chio' Le' na' žon byena' gona' kan ẕnna x̱tižo'o.

⁹⁵Benne' wen da' ẕinnj ka' bwíagake' neda' nich gak wžía yí'gake' neda', san neda' ẕlab ḻaža'a da' žsedle diža' chio' neto'.

⁹⁶Ba bḻe'ekzla' ẕde chegak yógo'te da' zej de yežlyó, san da' ka' wnnakzo' Le' batkle te chégaken.

⁹⁷Dios, nží'iḻe'ela' da' žsedlo' neto'. Dot ža ẕlab ḻaža'a ka ẕnnan.

⁹⁸Ni'a che da' bchi'lo' neto', beno' ga žejní'ižela' ka benne' ka' ẕžá'agake' neda' dan' zóaḻenteze da' wnnakzo' neda'.

⁹⁹Žejní'ižela' ka benne' ka' žsédgekle' neda' dan' ẕlab ḻaža'a da' žsedle diža' chio' neda'.

¹⁰⁰Ba žejní'ižela' ka benne' gole ka' dan' žónteza' ka ẕnna da' bchi'lo' Le' neto'.

¹⁰¹Ben byena' bi be gona' da' bi nak chawe', nich gónteza' ka ẕnna x̱tižo'o.

¹⁰²Bi bsana' žona' kan bchi'a ḻažo'o dan' bsedlo' Le' neda'.

¹⁰³X̱tižo'o naken ka to da' ẕix̱ḻe'e ḻo žoa'a. Nakžen ẕix̱ ka nak da' ẕix̱ che bez ḻo žoa'a.

¹⁰⁴Ni'a che da' wnnakzo' Le' naka' benne' sina'. Che ḻen bi ẕḻe'ela' chawe' yógo'te da' wen ḻaže'.

¹⁰⁵Ka to yi' nak x̱tižo'o gan ẕda', dan' žsa'nín' nez da' ẕzá'ḻena'.

¹⁰⁶Bzetja' La la'y chio', Dios, na' bchebe ḻaža'a gónteza' ka bchi'a ḻažo'o da' naken chawe'.

¹⁰⁷X̱ana' Dios, ẕzáka'ḻi'a. Ben choch neda' káteze bchebe ḻažo'o gono'.

¹⁰⁸X̱ana' Dios, žáta'yoela' Le' si'o da' žoe ḻawa' Le'. Bsedle neda' gona' ka bchi'a ḻažo'o.

¹⁰⁹Že' zédtezla' dan' zoa' gata', na' bi na' gaḻ ḻaža'a gona' da' wnnakzo' Le'.

¹¹⁰Benne' wen da' ẕinnj ka' bzáljgake' do yeḻj nich senen neda', san neda' bi bsana' žona' da' bchi'lo' Le' neto'.

¹¹¹Ba wžía' da' žsedle x̱tižo'o neda' nich gaken da' gápekza' to chi'ize, dan' nak x̱tižo'o da' ẕdan ḻáže'ḻi'a.

¹¹²Zoakze ḻáẕda'wa' gónteza' ka ẕnna x̱tižo'o na' zejte ža gata'.

¹¹³Bi ẕḻe'ela' chawe' benne' ka' ẕḻoé'ezele kwíngake' chawe', san nži'ila' da' wnnakzo' Le'.

¹¹⁴Nako' Le' ka to yo'o gan ẕga'na' chawe', na' ka to da' žape chi'in neda', dan' žx̱en ḻaža'a gaken ka ẕnna x̱tižo'o.

¹¹⁵Le kwas gan zoa', ḻe'e, benne' wen da' ẕinnj ka', dan' gónteza' ka bchi'le Dios chia' neto'.

¹¹⁶Ben choch neda' káteze ẕnna x̱tižo'o, na' soa' nbana', na' bi yedoe'ela' ni'a che dan' žx̱en ḻaža'a.

¹¹⁷Ben choch neda', na' la', na' chaz ḻáže'teza' x̱tižo'o.

¹¹⁸Blej bchochj yógo'te benne' ka' bi žóngake' kan ẕnna x̱tižo'o dan' nak yeḻa' žejní'il chégake' da' wen ḻaže'.

¹¹⁹Yógo'te benne' wen da' ẕinnj ka' zej nake' ka bebe ḻo yežlyó nga. Che ḻen nži'ila' da' žsedle diža' chio' neto'.

¹²⁰Žẕize beḻa' žen chia' dan' ẕžeba' Le', san žapa' ba la'ne da' ẕchi'a ḻažo'o, da' naken chawe'.

¹²¹Žona' ka nak da' bchi'a ḻažo'o, da' naken chawe'. Bi wdío' neda' ḻo na'gak benne' ka' žsaka' zí'gake' neda'.

¹²²Bchebe ḻažo'o chia' gon chawo'o neda'. Bi go'o latje benne' ka' ẕka'n ẕen kwíngake' wsaka' zí'gake' neda'.

¹²³Gok yej ḻawa' dan' ẕbeza' yido' yesló' neda', na' wchi'a ḻažo'o neto' kan ẕnna x̱tižo'o.

¹²⁴Ḻo yeḻa' žeyache' ḻaže' chio' ben chawe' neda', wen žin chio', na' bsedle neda' gona' ka ẕnna x̱tižo'o.

¹²⁵Bzejní'il neda', wen žin chio', nich gónbi'a da' žsedle diža' chio' neto'.

¹²⁶X̱ana' Dios, ba bžin ža bi da' gono', dan' bzóagake' cheḻa'ale da' wnnakzo' Le'.

¹²⁷Che ḻen neda' nží'ižela' da' bchi'lo' neto', ka ya oro, na' ka da' záka'že ka ya oron'.

¹²⁸Che ḻen žekla' záka'že da' wnnó' ka yógo'te da' de, na' bi ẕḻe'ela' chawe' yógo'te da' zej naken da' wen laže'.

¹²⁹Žebanlto' ka žsedle diža' chio' neto'. Che ḻen dot ḻaža'a žónteza' ka ẕnnan.

¹³⁰Kate' no benne' bi gak chejni'ile' x̱tižo'o, x̱tižo'o na'kze žsa'nín' ḻe'. Ẕzejni'ilen benne' gax̱jw ḻaže' ka'.