Salmos 119:36-140

³⁶Be̱n sa lazra' guna' ca dxuse̱de dizra' chiu' netu', chee̱ quebe gaca' benne' wecude.

³⁷Quebe gu'u lataj gucá'ana szrena' bedáu' xia xaga ca'. Be̱n dipa xichaj lázrdawa' chee̱ guna' ca dxenná xrtizru'.

³⁸Be̱n ca dxenná xrtizru' da guche̱be lazru' chia' neda', we̱n zrin chiu', chee̱ zreba' Lue'.

³⁹Bde chalá'ala dizra' schanni' da dxelenné̱' chia', da na' dxezreba', lawe' da xrlátaje zaj naca xrba chiu'.

⁴⁰Dxezá lazra' guna' da bdxixruj be'u. Be̱n dipa xichaj lázrdawa' nen da xrlátaje chiu'.

⁴¹Gudá xexache lazru' neda', Xrana' Dios. Gudá guseláu' neda', ca ba guche̱be lazru' gunu'.

⁴²Beche̱ba' lau bénnea' dxusi'e̱ neda' xel-la' stu', gunnía': Dxuxrén lazra' xrtizra' Xrana' Dios.

⁴³Be̱n tu séquezda' guchálaja' dizra' li lazre' chiu', lawe' da dxebeza lazra' da ca' dxuchi'u chee̱ntu'.

⁴⁴Tu gúnzqueza' ca dxenná da bdxixruj be'u. Guna' na tu chí'izqueze, ne chadía chacanna.

⁴⁵Láqueza' neda' lawe' da dxe'a gunne xue guna' ca bdxixruj be'u.

⁴⁶Guchálajqueza' ca dxuse̱de dizra' chiu' netu' lau benne' wenná bea ca', na' québequeze xedué'eda'.

⁴⁷Wabéle̱'e̱quezda' guna' ca bdxixruj be'u, da ca' nazrí'ile̱'e̱da'.

⁴⁸Dxeche̱be lazra' guna' ca bdxixruj be'u, da nazrí'ida', na' gulaba lazra' ca naca xrba chiu'.

⁴⁹Bsa lazre' da guche̱be lazru' chia' neda', we̱n zrin chiu', da na' be̱nu' dxebeza lazra'.

⁵⁰Gate na' guzaca zi'a, guzúa tu da bexúe zren na neda' lawe' da be̱n dipa xrtizru' xichaj lázrdawa'.

⁵¹Benne' dxulucá'ana szren cuine̱' belún lale̱' chia' neda', san québequeze gusana' da dxenná da bdxixruj be'u.

⁵²Xeajsá lazra' da bchi'u chee̱ntu' nédxudaute̱, Xran, na' bexaca zrena'.

⁵³Nen dute̱ xel-la' dxezrá'a guzúa' lu da ste̱be ne̱ chee̱ benne' ca' dxelune̱' da zrinnaj, benne' ca' dxuluzúe̱' chalá'ala da bdxixruj be'u.

⁵⁴Xrba chiu' ca' gulaca na chia' ca tu da dxul-la' gate na' zua' tu xe̱zr la xu zitu'.

⁵⁵Chizrela xeajsá lazra' lau' Lue', Xrana' Dios, na' tu bénzqueza' ca dxenná da bdxixruj be'u.

⁵⁶Lu da ba neza caní guzúa' lawe' da tu bé̱nzqueza' ca zaj naca da bdxixruj be'u.

⁵⁷Da dxezá lazra' nácaquezu' Lue', Xrana' Dios. Ba gunnía' tu gúnzqueza' ca naca xrtizru'.

⁵⁸Dute̱ lázrdawa' dxenaba' Lue' xidu' gácale̱nu' neda'. Bexache lazre' neda' ca ba gunnáu' gunu'.

⁵⁹Gunná' xannia' ca zaj naca da dxuna', na' xecha lasa dxuna' ca dxuse̱de dizra' chiu' netu'.

⁶⁰Be̱na' ba xuzre, ne quebe guzreda' chee̱ tu gúnzqueza' ca bdxixruj be'u.

⁶¹Xralaj chee̱ benne' ca' dxelune̱' da cale̱la zaj nuchele̱ na neda', san quebe ne gal-la lazra' ca dxenná da bdxixruj be'u.

⁶²Dxe̱la dxasa' chee̱ güe lá'ana' Lue' lawe' da xrlátaje zaj naca da ca' dxuchi'u chee̱ntu'.

⁶³Naca' tuze nen xúgute̱ benne' ca' dxelezrebe̱' Lue', benne' ca' tu dxelúnzqueze̱' da bdxixruj be'u.

⁶⁴Xrana' Dios, dxezrín dute̱ xe̱zr la xu xel-la' dxexache lazre' chiu'. Bse̱de neda' chee̱ guna' ca dxenná xrba chiu'.

⁶⁵Ba be̱nu' guca chawe' chia' neda', we̱n zrin chiu'. Xran, be̱nu' na cáte̱ze dxenná xrtizru'.

⁶⁶Bse̱de neda' chee̱ gueque be'eda' da naca xrlátaje, ne chee̱ chéajni'ida' lawe' da dxéajle̱'a da bdxixruj be'u.

⁶⁷Nédxula ca bzéxruju' neda' gudéa' chalá'ala, na' na'a tu dxúnzqueza' ca dxenná xrtizru'.

⁶⁸Nacu' xrlátaje, ne dxunu' gaca chawe' chee̱ntu'. Bse̱de neda' guna' ca naca xrba chiu'.

⁶⁹Benne' dxulucá'ana szren cuine̱' gulenné̱' chia' da we̱n lazre' san dute̱ lázrdawa' tu gúnzqueza' ca bdxixruj be'u.

⁷⁰Quebe xu'u xel-la' dxéajni'i lázrdau benne' ca'. Neda' dxezaca ba lázrele̱na' da dxenná da bdxixruj be'u.

⁷¹Chawe' naca bzéxruju' neda' chee̱ gusé̱dia' guna' ca naca xrba chiu'.

⁷²Cháwedxa naca da bdxixruj be'u chia' neda' quez ca gaxúa gaxúane dumí oro, ne plata.

⁷³Nen ná'quezu' be̱nu' neda' cáte̱ze naca'. Bzéajni'i neda' chee̱ gusé̱dia' guna' ca bdxixruj be'u.

⁷⁴Benne' dxelezrebe̱' Lue' xelelé'ene̱' neda'. Xelebene̱' lawe' da dxebeza lazra' gaca ca dxenná xrtizru'.

⁷⁵Xran, ba nézquezda' xrlátaje naca da dxuchi'u chee̱ntu', na' lu dute̱ xel-la' li lazre' chiu' bsaca zi'u neda'.

⁷⁶Lu dute̱ xel-la' dxexache lazre' chiu' bexúe zren neda' cáte̱ze dxenná da guche̱be lazru' chia' neda', we̱n zrin chiu'.

⁷⁷Bexache lazre' neda' chee̱ gaca bana' lawe' da dxezaca ba lázrele̱na' da bdxixruj be'u.

⁷⁸Be̱n xelexedué'e benne' ca' dxulucá'ana szren cuina lawe' da gulenné̱' schanni' chia', ne quebe bi bena' chee̱'. Neda' gulaba lazra' ca da bdxixruj be'u.

⁷⁹Be̱n xelexelá' benne' ca' dxelezrebe̱' Lue', chee̱ xelenne̱' chia', na' xulusé̱die̱' da dxuse̱de dizra' chiu' netu'.

⁸⁰Be̱n gaca' du lazre' ca naca xrba chiu' chee̱ québequeze xedué'eda'.

⁸¹Zua bénne'du xu'a lu da ste̱be lawe' da dxebeza' xidu' guseláu' neda', na' dxebeza lazra' gaca ca dxenná xrtizru'.

⁸²Dxezé̱ bxrinne xiaj lawa' lawe' da dxezá lazra' xrtizru', dxennia': ¿Bátaqueze xexúe zrenu' neda'?

⁸³Dxebizra' ca tu buzude xide ze̱ na lu zren, san quebe dxal-la lazra' guna' ca dxenná xrba chiu'.

⁸⁴¿Bal-la zra gaca bana' neda', we̱n zrin chiu'? ¿Bátaqueze gudéu' lu da ba xa' benne' ca' dxeláu zi' xuzre̱' neda'?

⁸⁵Benne' dxulucá'ana szren cuine̱' gule̱ne̱' tu xe̱dxu naga cheajcházia'. Québequeze dxelune̱' ca dxenná da bdxixruj be'u.

⁸⁶Da líqueze zaj naca xúgute̱ da bdxixruj be'u. Gúcale̱ neda' lawe' da dxeláu zi' xuzre̱' neda', ne quebe bi nuna' chee̱'.

⁸⁷Xeláteze la belutie̱' neda', san quebe ne gusana' guna' ca bdxixruj be'u.

⁸⁸Lu xel-la' dxexache lazre' chiu' be̱n dipa xichaj lázrdawa', chee̱ tu gúnzqueza' ca dxuse̱de dizra' chiu' netu'.

⁸⁹Xrana' Dios, tu chí'izqueze zua xrtizru' xabáa na'la.

⁹⁰Xel-la' li lazre' chiu' sua na chee̱ xúgute̱ bénneache. Lue' bzua chúchuquezu' xe̱zr la xu, na' zúaqueze na.

⁹¹Ne̱ chee̱ da gunnáquezu' zaj nnita xúgute̱ da de̱, na' xúgute̱ da ca' dxelún na zrin chiu'.

⁹²La quebe bezaca ba lázrele̱na' da bdxixruj be'u bache benítia' lu da guzaca zi'a.

⁹³Cabátaqueze gal-la lazra' da bdxixruj be'u lawe' da ne̱ chee̱ da ca' ba btipu' lazra'.

⁹⁴Chiu' Lue' naca' neda'. Bselá neda', lawe' da dxuna' ba xuzre guna' ca bdxixruj be'u.

⁹⁵Benne' dxelebéaj xichaj Dios gulenné̱'e̱ neda' chee̱ xuluzría xi'e̱ neda', san neda' dxulaba lazra' ca dxuse̱de dizra' chiu'.

⁹⁶Dxelé'equezda' dxeajsé̱ chee̱ xúgute̱ da de̱ lu xe̱zr la xu, san da bdxixruj be'u Lue' québequeze cheajsé̱ chee̱ na.

⁹⁷Dios, nazrí'ile̱'e̱da' da bdxixruj be'u. Du zra dxulaba lazra' ca naca na.

⁹⁸Ne̱ chee̱ da bdxixruj be'u nunu' nácadxa' sina ca benne' ca' dxeledábague̱' neda' lawe' da tu zúale̱zqueze da bdxixruj be'u neda'.

⁹⁹Dxéajni'idxeda' ca benne' ca' dxulusé̱dene̱' neda' lawe' da dxulaba lazra' ca dxuse̱de dizra' chiu' neda'.

¹⁰⁰Ba guxéajni'idxeda' ca benne' gula ca' lawe' da tu dxúnzqueza' ca dxenná da bdxixruj be'u.

¹⁰¹Be̱na' ba xuzre quebe bi da cale̱la guna' chee̱ tu gúnzqueza' ca dxenná xrtizru'.

¹⁰²Quebe bsana' dxuna' da ca' nuchi'u chee̱ntu' lawe' da Lué'queze bsé̱denu' neda'.

¹⁰³Xrtizru' naca na ca tu da zíxrele̱'e̱ lu dxu'a. Nácadxa na zixre ca bzrína'dau' lu dxu'a.

¹⁰⁴Ne̱ chee̱ da bdxixruj be'u naca' benne' sina. Chee̱ le̱ na' dxecuídeda' xúgute̱ da we̱n lazre'.

¹⁰⁵Ca tu xi' naca xrtizru' naga dxedá', da dxusení na neza xu'a.

¹⁰⁶Bzétaja' Dios, ne guche̱be lazra' tu gúnzqueza' ca nuchi'u chee̱ntu' da naca na xrlátaje.

¹⁰⁷Dxezaca zí'le̱'a. Xrana' Dios, btipa lazra' cáte̱ze guche̱be lazru' gunu'.

¹⁰⁸Xrana' Dios, dxata' xueda' Lue' si'u da dxue lá'ana' Lue', ne gusé̱denu' neda' guna' ca nuchi'u chee̱ntu'.

¹⁰⁹Tu zúazqueza' lu da ste̱be chee̱ xel-la' gute, san québequeze ne gal-la lazra' guna' ca bdxixruj be'u.

¹¹⁰Benne' dxelebéaj xichaj Dios buluzale̱' xralaj da que̱la na neda' san neda' quebe bsana' dxuna' ca bdxixruj be'u.

¹¹¹Ba gucá'a da dxuse̱de xrtizru' neda' chee̱ gaca na da gápaqueza' chadía chacanna lawe' da zaj naca xrtizru' da dxezaca ba lázrele̱'a.

¹¹²Zúate̱queze lázrdawa' guna' ca zaj naca xrba chiu' tu chí'izqueze, ca zrindxa zra cheajsé̱ chia'.

¹¹³Dxecuídeda' benne' ca' dxelune̱' láweze da xrlátaje, san nazrí'ida' da dxenná da bdxixruj be'u.

¹¹⁴Nacu' Lue' ca tu xu'u naga zua chawa', ne ca tu da dxucu'uj na neda', lawe' da dxebeza lazra' gaca na ca dxenná xrtizru'.

¹¹⁵Le gucuasa naga zua', le'e, benne' we̱n da cale̱la, lawe' da tu gúnzqueza' ca bdxixruj bea Dios chia'.

¹¹⁶Bze̱ chacha neda' cáte̱ze dxenná xrtizru', na' gaca bana', ne quebe xedué'eda' chee̱ da na' dxebeza lazra'.

¹¹⁷Bze̱ chacha neda', na' la', ne tu xezaca ba lázrezqueza' ca naca xrba chiu'.

¹¹⁸Bchuchu bléaju' xúgute̱ benne' ca' bulusane̱' ca naca xrba chiu' lawe' da we̱n lazre' naca xel-la' sina chee̱ benne' ca'.

¹¹⁹Ca be̱be bzria xi'u xúgute̱ benne' ca' dxelebéaj xíchaje̱' Lue' lu xe̱zr la xu nigá. Chee̱ le̱ na' nazrí'ida' da dxuse̱de dizra' chiu' netu'.

¹²⁰Dxezrize be̱la' dxen chia' lawe' da dxezreba' Lue', ne dxezreba' da dxuchi'u chee̱ntu' da naca na xrlátaje.

¹²¹Ba be̱na' ca da nuchi'u chee̱ntu', ne ca naca da xrlátaje. Quebe gudéu' neda' lu na' benne' ca' dxuluchínene̱' neda'.

¹²²Guche̱be lazre' chia' gunu' gaca chawe' chia'. Quebe gu'u lataj benne' ca' dxulucá'ana szren cuine̱' xuluchínene̱' neda' xadía.

¹²³Guzé̱ bxrinne xiaj lawa' lawe' da dxebeza' xidu' guseláu' neda', ne guchi'u chee̱ntu' ca dxenná xrtizru'.

¹²⁴Dute̱ xel-la' dxexache lazre' chiu' be̱n gaca chawe' chia' neda', we̱n zrin chiu', ne bse̱de neda' guna' ca naca xrba chiu'.

¹²⁵Naca' we̱n zrin chiu'. Bzéajni'i neda' chee̱ gúnbe'a da dxuse̱de dizra' chiu' netu'.

¹²⁶Xrana' Dios, ba bzrin zra bi gunu', lawe' da ba buluzúe̱' chalá'ala da bdxixruj be'u.

¹²⁷Chee̱ le̱ na' neda' nazrí'idxeda' da bdxixruj be'u Lue' quézcala oro, ne quézcala galega oro.

¹²⁸Chee̱ le̱ na' dxéqueda' zaj nácadxa li lazre' da bdxixruj be'u ca xúgute̱ da de̱, na' dxecuídeda' xúgute̱ da zaj naca na da we̱n lazre'.

¹²⁹Dxebánentu' ca dxuse̱de dizra' chiu' netu'. Chee̱ le̱ na' du lazra' tu dxúnzqueza' ca dxenná na.

¹³⁰Gate nu dxuzájla'a ca naca xrtizru', dxusaní na. Dxun na dxeléajni'i benne' dxexruj lazre' ca'.

¹³¹Guxá dxu'a, ne gucá'a lazra' lawe' da dxezá lazra' gúnbe'a da bdxixruj be'u.

¹³²Gunná' neda', ne bexache lazre' neda', ca tu dxúnzquezu' chee̱ benne' ca' zaj nazrí'ine̱' Lue'.

¹³³Be̱n tu gúnzqueza' ca dxenná xrtizru', ne quebe gu'u lataj da zrinnaj nna be'e na neda'.

¹³⁴Bselá neda' lu na' benne' xichaj zra'a ca', na' tu gúnzqueza' ca dxenná da bdxixruj be'u.

¹³⁵Be̱n gaca chawe' chia' neda', we̱n zrin chiu', ne bse̱de neda' guna' ca zaj naca xrba chiu' ca'.

¹³⁶Nisa gudxezra' guca na ca tu xe̱gu nisa lawe' da quebe dxelún bénneache ca bdxixruj be'u.

¹³⁷Xrana' Dios, xrlátaje nacu' Lue', ne li lazre' naca ca dxuchi'u chee̱ntu'.

¹³⁸Da dxuse̱de dizra' chiu' netu', da na' bzu' lu na'ntu', naca na da li, ne da li lazre'.

¹³⁹Dxedú lazra' lawe' da dxé'le̱'a gunne xue lawe' da gulal-la lazre' benne' ca' dxeledábague̱' neda' ca zaj naca xrtizru'.

¹⁴⁰Du lázrele̱'e̱ naca xrtizru', na' nazrí'ida' neda' na, naca' we̱n zrin chiu'.