39I kiboam saligam gambet landè fakangam di kenen; salngad ku tagbatam i kyangenan di kfung.
40Tafalbaam labat i syudadan, na tafalmom i dad guflidungan mdà di dad mngayu.
41Balù simto to magu mlius di banwen tmaku i dad knunan, na nadoy kenen i dademen saldan.
42Tafatum i dad to dmuen kenen, na taflehewam ale.
43Talaam nimò gban i dad tekan, du laam kenen tnabeng di kasfati.
44I bong kdatahan na kafyen tanweam di kenen; na tanweam i glalan.
45Mdà di dad kiboam kenen, tafanbalingam kenen too tua, balù ise fa bangan tua; na toom kenen fyà.
46E Amugu Dwata, tan i klo tatiam fbayà i harì mgalékam? Kel di landè sen? Na kel di kilen fa i too kinit i kalbutam kenen?
47Amugu Dwata, fandamam i kfukal klawil i dad to. Landè dé gukmamum dad to, du tanimoam ale, bay kdeela mlal mati na landè alì fye gaganla?
48Simto to mto na landè kfatin? Landè to gmadè i kiboan fye laan mati.
49E Amugu, tanè i kakdom landè kgilin tafitem di muna, i kakdom tafakangam di ku Dabid fagu di katlum?