Salmo 17:8-15

⁸Ilikey a kenikew te kezeetan iring te kedlikaya te etew te mata zin wey kenà mesazir, ne pengelangi a kenikew iring te kebpengalang te tagbis te menge anak din pinaaǥi te kedlekupi zin kandan.

⁹Kelesaǥi a te menge kuntada ku he edsurung kediey kayi te nekeliǥuy su edhimetayan e zan.

¹⁰Wazè dan hizu, ne pinaaǥi te kegkagi zan, ebpelavew zan.

¹¹Midpen-ehè e zan, ne ǥuntaan edliǥuyan e zan en. Edtaǥad dan dà te kebpekelugar zan te kedezaat kedì.

¹²Iring sikandan te ed-ayan he erimaung diyà te elesè din, he andam he ebpitaspitas te egkezawi zin.

¹³Nengazen, tebeka nu en sikandan wey zaaǥa nu is lalung he menge kuntada ku. Libriya a pinaaǥi te ǥehem nu, su wey e zan kenà mekeizi.

¹⁴Libriya a wey a kenà mekeizi kayi te menge etew he iyan dà ed-isipen dan is kelibutanen he menge vutang. Siluti nu sikandan te silut he inteǥana nu kandan, ne iragkes nu en daan is menge anak dan. Ne elin nu teǥenahi te silut is menge apù dan.

¹⁵Piru siak mulà, egkeehè ku sikew, su wazà a mebaal te salà. Emun egkepukew e en ne utew a zutun melipayen su egkeehè ku en sikew.