Mboe 17:8-15

⁸Nio na, itum koroŋ ku ŋonoono. Tana motom pio mi kuubukaala yo kembei ta man ikuubukaala lutuunu bizin.

⁹Pa koŋ koi bizin tiliu yo i. Iŋgi wal sananŋan tikamam be tipasaana yo.

¹⁰Wal tana lelen imun kek. Mi kalŋan izalla ma tipakurkur zitun.

¹¹Tito yo mi timar tise tio kek. Mi tiliu yo mi matan iurur be tipalkeete yo su toono i.

¹²Zin kembei laion ta peteli mi irru ka buzur. Zin kembei laion popoŋana tau ikewe la su leleene, mi izza ma imbotmbot.

¹³Yooba, maŋga lak! Muuŋgu pio mi koto koŋ koi bizin. Kas zin pa buza ku ma tisu lup.

¹⁴Zin na, tire koroŋ ki toono kembei koroŋ kizin ŋonoono kat. Swe mburom pizin, mi pun zin ma timap. Tamen wal ku ta nu lelem pizin ilip na, nu pututu zin mi tikanan ma kopon isaana. Mi lutun bizin na, tirao kat pa koroŋ ta boozomen. Tabe tindoundou koroŋ boozo pa lutun bizin tabe tipet pa kaimer i.

¹⁵Mi nio nako aŋre motom. Pa nio tomtom ndeeŋeŋoŋ. Tana sombe aŋkeene mi burup ma aŋmaŋga, nako leleŋ ambai kat mi aŋyamaana kembei aŋbotmbot su kerem uunu.