SALAMO 38:6-21

⁶Lau na igo dihomu, na goru dihomu, dina idoinai na tai ḡadeḡademu.

⁷Badina be taugu anina e siahumu, hidiogu na se aukamu.

⁸Vada na manoka, hisi ese e gugubagumu; na ḡanaḡanamu, daragu e dokomu dainai.

⁹Ḡaubada e, egu ura idoinai oi dibamu, egu ḡanaḡana na emu ai se hehunimu.

¹⁰Kudougu e hetahamu, egu goada e oremu; matagu diaridia danu vada e rakatanigu.

¹¹Turagu bona bamogu na egu gorere amo e gini daudaumu, bona varavaragu na dahu ai gigini.

¹²Egu mauri e tahuamu taudia ese edia idoa e atomu; ihadikagu e uramu taudia ese hereva dikadia na latagu ai e gwauraimu, bona dina idoinai ikoigu daladia e haeromu.

¹³A lau na taia-kudima tauna na heto, asina kamonaimu, mu tauna, uduna se haḡaiamu, na heto.

¹⁴Oibe, lau na se kamonaimu tauna na heto, uduna ai gwaugwau herevadia asie miamu tauna na heto.

¹⁵Iehova e, lau oi na narimumu; Ḡaubada e, egu Dirava, oi ba haere.

¹⁶Badina be na ḡuriḡurimu, na tomu “Mani emu kara aegu e dedimu negadia ai e heaḡimu taudia na ba laodia ahu, basie kirikirilaigu”.

¹⁷Badina be lau na vada ba ketomu, egu hisihisi na vairagu ai e miamu nega idoinai.

¹⁸Egu kara dika na gwaurai hedinaraimu, egu kara havara amo na helalo kerehaimu.

¹⁹Asi badina e inai henigumu taudia na mai goadadia, e inai henigu koikoimu taudia na hutuma.

²⁰Egu kara namo na dika e davanalaiamu taudia na lau inaigu, badina be lau ese namo na ḡavaiamu.

²¹Iehova e, basio rakatanigu; egu Dirava e, egu amo dauhai basio noho.