SALMOS 38:6-21

⁶Nicuitlapanhuitoltic huan amo hueli nijtlanana notzonteco. Semilhuitl nichocatinemi por catli nijchijtoc.

⁷Nochi notlacayo tliquisa. Huan ya tlantinemi nochicahualis por notlajtlacol.

⁸Nimomati quen nitlatejtejtzontli. Niyon quentzi fuerza amo nijpiya. Nelía nitlaayijhuía ipan noyolo.

⁹NoTeco, ta tijmati quen nijnequi sempa niitztos cuali moixpa. Nochi catli nimoilhuía tlanemijya nesi moixpa. Amo tleno hueli nimitztlatilía.

¹⁰Noyolo nelhuihuipica, huan ya tlantinemi nochicahualis. Ayacmo hueli nitlachiya cuali.

¹¹Nonelhuampoyohua huan noteiximatcahua san nechhuejcaitaj, pampa quiijiyaj nococohua.

¹²Inijuanti catli quinequij nechmictise quisencahuaj tlaquetztli para nechmasiltise. Catli quinequij nechcocose tlatoctzitzi nechilhuíaj quenicatza nechtzontlamiltise. Semilhuitl quitemolíaj quenicatza nechcajcayahuase.

¹³Pero na nimochihua quen amo nijcaqui catli quiijtohuaj. Nimochihua quen se ninono huan amo nijtlapohua nocamac para niquinnanquilis.

¹⁴Quena, na nimochihua quen amo nijcaqui inincamanal, huan amo tleno niquijtohua para ica nimomanahuis.

¹⁵Pampa san ipan ta nimochiya, TOTECO, tinoDios. Na nijcajtoc momaco para xiquinnanquili huan techmanahui.

¹⁶San nimitztlajtlanía para amo xiquincahuili ma noca huetzcaca. Amo xiquincahuili ma mohueyitlalica noixpa pampa nihuetzqui.

¹⁷Nijmati nimiquis pampa tlacuajcualoli amo nechcahua niyon se tlatoctzi.

¹⁸TOTECO, nijnequi nimitzpannextilis nochi notlajtlacolhua, pampa nelía nimotequipachohua ica catli nijchijtoc.

¹⁹Nocualancaitacahua momiyaquilijtoque huan moyoltetilijtoque. Miyac nechcualancaitaj, masque amo tleno niquinchihuilijtoc.

²⁰Masque catli cuali niquinchihuilijtoc, nechcuepilijtoque ica catli fiero. Nechcualancaitaj pampa nijtoquilía catli cuali.

²¹NoTeco Dios, amo techcajtehua noseli. Amo ximoiyocatlali ica na.