SALAMO 37:7-23

⁷Iehova enai ba laḡa ani, ia ba naria mai haheaukamu ida; Ialomu basine hekwarahi, ena ḡaukara ai e tagamu tauna dainai, eiava ena lalo-hadai dikadia anidia e karamu tauna dainai.

⁸Badu baine mia, daḡedaḡe ba rakatania. Lalomu basio hahekwarahia: una na kara dika e havaraiamu.

⁹Badina be kara dika taudia na bae henege daure; a Iehova e nariamu taudia ese tano bae abia.

¹⁰Asi vanahana kara dika tauna baine puki; ena gabu ba tahua, to basio davaria.

¹¹A manau taudia ese tano bae abia; maino ena harihari-bada idia ese bae moalelaia.

¹²Kara dika tauna ese kara maoromaoro tauna ihadikana daladia e haeromu, gadigadina e hahedai heniamu;

¹³a Ḡaubada ese kara dika tauna e kirikirilaiamu, badina be e itaiamu, ena dina be maimu.

¹⁴Kara dika taudia ese dare e veridia lasimu, bona edia peva e marediamu, ogoḡami taudia bona e dabumu taudia ialadia totona, bona kara maoromaoro taudia iala-masedia totona.

¹⁵Edia dare na sibodia kudoudia ai bae vareai, bona edia peva bae kwaidu.

¹⁶Kara maoromaoro tauna ena ogoḡami ese kara dika taudia hutuma edia taḡa e hereaiamu.

¹⁷Badina be kara dika taudia imadia na bae kwaidu, a Iehova ese kara maoromaoro taudia e haginidia toremu.

¹⁸Iehova ese asi edia kerere taudia edia dina dibana, idia ahudia bae mia hanaihanai.

¹⁹Haida ese asie hahemaraidiamu dika negadia ai, bona doe negadia ai bogadia e kunumu.

²⁰A kara dika taudia na e mase oremu; Iehova inaina loḡora na rei gabudia hairaidia na heto, idia na e boiomu, kwalahu ai e boio vaitanimu.

²¹Kara dika tauna na e abi torehaimu, bena ihalouna asi dibana a kara maoromaoro tauna na mai ena harihari-bada ida e henimu.

²²Badina be Iehova ese e hanamodiamu taudia ese tano bae abia a baine ihi-ihiraidia taudia na bae henege daure.

²³Tau namona ena ae-raka na Iehova ese e reḡuamu, bona ena dala e moalelaiamu tauna na ia ese e haginiamu.