Ruma 12:1-15

¹Sikan ian, mgo sulod, su dakol ka pogkohoy-u to Magboboot kanta, ogbuyu a kaniu to oyow igbogoy now ka lawa now dio to Magboboot to oyow ogpakatuman kow to ogkoiniatan din. Sikan ka igkatubad ta kandin no manokal ki pad. No og-awoson to waro solug no maroot to mgo hinimuan ta oyow igkarago din. Sikan ian ka litos no batasan ta ko ogsimboon ta ka Magboboot.

²Kono kow og-unug to mgo batasan to mgo otow no kono ogtuu no kai to kalibutan. Di atag, bogayi now ka Magboboot to oyow ogkahalin on ka goinawa now ligkat to ungod ogkoiam on ka mgo doromdom now. No ian su oyow ogpakasabut kow on ko nokoy ka ogkoiniatan to Magboboot, no ian ka maroyow no batasan no ogkoiniatan din no kono ogkaalang-alang.

³Nò, su nabogayan a to katondanan ku to og-alap-alap to kagi rin, ognangon a kaniu to og-awoson now tibo to kono kow ogsumansuman to madmaroyow kow to mgo duma now. Di tongod to katouanan now, og-awoson to oglitoslitos do ka doromdom now no ogpakasokod to pogtuu now no imbogoy to Magboboot kaniu.

⁴Pananglitan, tibo kinow, duon lawa ta no mohon-ing ka sumpul to tag sagboka no lawa ta. Di ka tibo to sikan no sumpul, ogloinloin to katondanan.

⁵Ogkounawa rod kanta no nigtuu ki Hisu Kristu. Agad mohon-ing kinow no otow, sagboka ro ka lawa ta no nasagboka kinow on ki Hisu Kristu. No tibo kanta, ogkounawa to lawa ta no nigmasumsumpuloy.

⁶No to tag sagboka kanta no sumpul to lawa ni Hisus, duon katouanan ta no ingkabogoy to Magboboot ligkat to pogkohoy-u rin kanta, di ogloinloin ka katouanan to tag sagboka kanta. Sikan ian, og-awoson ta no oghimuon ta ka ogkatouanan ta. Pananglitan, ko nabogayan kinow on to katouanan to ognangonnangon to kagi no ogligkat to Magboboot, og-awoson ta to ognangonnangon ki to kagi rin ko songo monu karakol ka pogtuu ta kandin.

⁷Ko nabogayan ki to katouanan to ogbulig to duma ta, og-awoson ta to ogtuman to sikan. No ko duon katouanan ta to og-anad to duma ta, songo og-awoson ta to oghimu ki to sikan.

⁸Ka otow no nabogayan to katouanan to ogpohogot to pogtuu to duma rin, songo og-awoson dod to sikan ka oghimuon din. Ko nabogayan ki to katouanan to ogpangabang to songo otow no duon og-awoson, ogbogayan ta to waro logodlogod. No ka otow no nabogayan to katondanan to pog-alap to duma no mgo otow, og-awoson din to og-ay-ayaran din to pog-alap din kandan. No ko nabogayan ki to katouanan to pogkohoy-u to mgo otow no nabaybayaran, og-awoson to ogkohoy-uan ta ian sikandan no ogligkat to pogkarago ta.

⁹Og-awoson to tu-tuu ian to dakol ka goinawa ta to duma ta. Og-awoson ta no og-iniugan ta ka agad nokoy no batasan no maroot, di oggongonan ta ka tibo no batasan no maroyow.

¹⁰Sikanta no nigtuu ki Hisus, og-awoson to ogmaam-amanooy kinow to goinawa ta woy ogpatatahuroy kinow on ian.

¹¹Kono kow ogpapogulpogul di hogoti now ka goinawa now to ogtuman to ogkoiniatan to Lagboy no Igbuyag ta no si Hisu Kristu.

¹²Og-awoson to ungod kinow ogkarago su duon pog-iman-iman ta to pogkouyag ta uromo. Og-awoson to og-aguantoon ta ka mgo igkabaybayari ta, woy ungod ki og-ampu to Magboboot.

¹³No ungod ki ogbulig to mgo duma ta no nigtuu ki Hisus ko duon og-awoson dan. Ko duon otow no ogdatong poron to baloy ta, ogpapanoikon ta woy ogsagmanon ta.

¹⁴Pakolkohoy-ui now to Magboboot ka mgo otow no ogbayadbayad kaniu. Ogbuyu ki to oyow ogkabuligan sikandan. Kono ta igpanungayow.

¹⁵No ko duon otow no ogkarago, ogdalong ki to igkarago dan, di ko duon otow no ogpakasinogow, songo ogdalong ki to igkasinogow ran.