Romanos 12:1-15

¹Ca'an naca, bi bícha'dau', lu xel-la dxexache lazre' chee̱ Dios, dxata' xúeda' le'e guzúa cuínale lu na' Dios ca tu guna' ban, da naca na lá'azxa, ne da xezaca ba lazre' Dios. Da nigá naca na tu da gucá'ana szrene Dios da dxal-la' gunle.

²Québedxa gunle ca dxelún bénneache chee̱ xe̱zr la xu nigá, san le guchá cuínale chee̱ caní zra dute̱ ca naca lu xichaj lázrdaule. Ca'an gaca, gúnbeale da dxaca lazre' Dios gunle, da na' naca xrlátaje, ne da dxezaca ba lazre' Dios, ne da naca na li lazre'.

³Ne̱ chee̱ da nusebaga Dios neda' lu da chawe' chee̱' dxapa' xúgute̱le le'e quebe nu benne' dxal-la' gucá'ana cuine̱' szrendxa ca dxal-la' gune̱', san dxal-la' guxúe̱' ca da naque̱' lu xel-la dxexruj lazre', cáte̱ze naca xel-la dxeajlí lazre' da nunezruj Dios le̱'.

⁴Ca naca chee̱ be̱l-la' dxen chee̱dxu, zánete̱ da napa na, na' xúgute̱ da ca' quebe dxelún na tuze zrin,

⁵cá'anqueze dxi'u, láqueze naxandxu, nácadxu ca tuze be̱l-la' dxen chee̱ Cristo, ne nácadxu tuze tudxu xetudxu ca zaj naca da ca' napa tu be̱l-la' dxen chee̱ nu benne'.

⁶Dios nunne̱' dxi'u cha chee̱dxu ca da gaca gundxu ca da dxaca lazre̱' gunne̱' tu tudxu. Dxal-la' guchine xánnedxu ca da nunne̱' dxi'u. Che nunne̱' dxi'u chee̱ guchálajdxu waláz chee̱', dxal-la' gundxu na dute̱ xel-la dxeajlí lazre' da nápadxu.

⁷Che nunne̱' dxi'u chee̱ gundxu zrin chee̱ ljwézredxu, dxal-la' gundxu na cháwe'dau'. Che nunne̱' dxi'u chee̱ gusé̱dedxu bénneache, dxal-la' guse̱de xánnedxu le̱'.

⁸Che nunne̱' dxi'u chee̱ gutípadxu lazre' bénneache, dxal-la' gutipa xánnedxu lazre' le̱'. Che nunne̱' dxi'u chee̱ bi gunézrujdxu, dxal-la' gundxu na du lázredxu. Che nunne̱' dxi'u chee̱ nne̱ xuedxu, dxal-la' guxúe xánnedxu ca dxundxu na. Che nunne̱' dxi'u gácale̱dxu benne' xache' ca', dxal-la' gundxu na dute̱ xel-la dxebé chee̱dxu.

⁹Le zri'i ljwézrele du lázrele tule xetule. Le guzúa chalá'ala da cale̱la, ne le gun da xrlátaje.

¹⁰Dxal-la' zri'i ljwézrele tule xetule ca nazri'ile bi bíchequezle. Le gapa ba lá'ana ljwézrele, ne le güe lataj tule xetule.

¹¹Le gun zi' lázrele, ne quebe gácale zrawe̱de, na' le gun zrin chee̱ Xránadxu dute̱ lázrdaule.

¹²Le sua xel-la dxebé lu da dxebeza lázrele. Le gaca dxexruj lazre' gate dxedele xel-la zi'. Le guchálajle̱teze Xránadxu.

¹³Le gunezruj da dxelexazrje benne' ca' zaj naque̱' bi chee̱ Dios. Le si' lu na'le du lázrele benne' ca' zá'aque̱' dxelenabe̱' le'e.

¹⁴Le naba da chawe' chee̱ benne' ca' zaj nau zi' xuzre̱' le'e. Le naba da xrlátaje chee̱', ne quebe nábale da cale̱la chee̱ benne' ca'.

¹⁵Le be nen benne' dxelebé, ne le xexache lazre' benne' ca' dxelebezre xache̱'.