Romu 5:3-11

³La sou nenge taꞌosasou ane nesi uasi, nenge taꞌosasou tuꞌutuꞌumaxu ane muxali noxinge kalumo, xo nenge telavusou lexe no anu tuꞌutuꞌumaxu ne la anu uꞌoxonu pekiaꞌinge.

⁴Mo tatulu pekiaꞌinge no ꞌa tuꞌutuꞌumaxu, xe lexe tauaꞌalixu tuꞌutuꞌumaxu ne, la nenge taxolu sou taloopalasi.

⁵Mo nenge taxolu taloloopalasi, la nenge tamomomo sou tamaela uasi, xo Lataua mulosinge Uleenu Tavuna muneꞌe muxolu noxinge, la muꞌanaꞌanalinenge no anu ꞌilixo sou tanengexaꞌa ta menexinge.

⁶La sou ngamaisou, no mine nenge xavinenge sou menge tasuꞌulinenge la uasi, la Lataua musosovosou voxo sou Kalisito muneꞌe musolisinge nenge ta mitema sou susu, la mulivulinenge.

⁷Mo anu umomomo sou itema vile usoli sou usuꞌulinu itema vile ꞌilixonu mulapu uasi, ia lexe anu mumaisou itema ne muꞌoxonu ꞌilixo laixe la sou anu male umomomo sou ulai usoli sou usuꞌulinu.

⁸La nenge texolu loxo ta mitema sou susu ia Kalisito muneꞌe musolisinge. No anu ꞌilixo e Lataua muꞌoxonu ne, la mumaxaꞌu lamana lexe anu tanunenge misevile.

⁹La sou no mine Kalisito musoli xe sialuxu muꞌuinenge, la sou Lataua mumoxoꞌinge lexe nenge ta mitema telapu. La sou nenge telavusou lexe Anu usuꞌulinenge laixe no anu voxo sou laꞌia noxou Lataua uxali.

¹⁰Xo no mine nenge texolu tauluau Latauasio, la ꞌOlu muneꞌe musoli, la sou no anu soli noxou ne la muxalixu opo vilesisi muxolu no tainenge nengeꞌa Lataua. Vaimomo ꞌo Lataua ꞌOlu munoꞌu mauli kaluxu uasi, mo nenge ane opo vilesisi muxolu no tainenge nengeꞌa Lataua, talavu laixe lexe nenge tanoꞌu mauli no anu maulixu kalumo.

¹¹Mo no anu anenesi uasi, ia nenge taꞌosa toxoxaꞌa manina noxou Lataua kalumo no anu xaixai noxou Tila noxinge Iesu Kalisito muꞌoxonu, la sou muxalixu opo vilesisi no tainenge nengeꞌa Lataua la.