ROMANOS 5:3-11

³Masi juani tsoꞌo ntsuꞌu tyiquee na laja loꞌo ndiꞌi̱ na chalyuu; masi lyaꞌ tsa tiꞌ nguꞌ jiꞌna, jlo tiꞌ na chaꞌ taca talo na loꞌo nchcubeꞌ na juaꞌa̱.

⁴Loꞌo ngualoo chaꞌ tiꞌí biꞌ, cua jlo tiꞌ na chaꞌ cua nguaꞌni cuayáꞌ ti Ni jiꞌna. Loꞌo liꞌ si ñaꞌa̱ ti tya tsoꞌo cresiya jiꞌna cuentya jiꞌi̱ ycuiꞌ Ndyosi, liꞌ cua ndu̱ tiꞌ na chaꞌ caca tsoꞌo jiꞌna nde loo la.

⁵Loꞌo juaꞌa̱ siꞌi sca chaꞌ nu nda ti tiꞌ na laca chaꞌ biꞌ, sca chaꞌ chañi laca biꞌ; cuaꞌni Ni jiꞌi̱. Cua nguaꞌni Ni chaꞌ ca tii cresiya jiꞌna, chaꞌ ntsuꞌu tsa tyiquee ycuiꞌ Ndyosi ñaꞌa̱ Ni jiꞌna; nguaꞌni Ni juaꞌa̱ nu loꞌo nda Ni Xtyiꞌi ycuiꞌ Ni jiꞌna.

⁶Jlo tiꞌ na chaꞌ ná caca cuaꞌni lyaá na jiꞌi̱ ycuiꞌ ca ti na jiꞌi̱ quiꞌya nu ntsuꞌu jiꞌna; pana loꞌo ndyalaa la cuiꞌ hora nu ngusta ycuiꞌ Ndyosi, liꞌ ngujuii Jesús xquiꞌya na, ñati̱ cuxi na.

⁷Tlyu tsa chaꞌ cuaꞌni na si tyajaꞌa̱ na cajaa na chaꞌ caja ñiꞌya̱ nu cuaꞌni lyaá na jiꞌi̱ chaca ñati̱; masi sca ñati̱ nu xcuiꞌ chaꞌ tsoꞌo nduꞌni, ná ntiꞌ na cajaa na cuentya jiꞌi̱ yu. Sca ti si sca ñati̱ nu tsoꞌo tsa nduꞌni laca biꞌ, tsoꞌo tsa nchcuiꞌ loꞌo tyaꞌa, ná tyiqueeꞌ tyajaꞌa̱ sca nguꞌ cajaa cuentya jiꞌi̱ ñati̱ biꞌ, si caca cuaꞌni lyaá nguꞌ jiꞌi̱ nu ñati̱ biꞌ liꞌ.

⁸Pana juaꞌa̱ nguaꞌni ycuiꞌ Ndyosi loꞌo na, chaꞌ culuꞌu Ni jiꞌna chaꞌ ntsuꞌu tsa tyiquee Ni ñaꞌa̱ Ni jiꞌna; nda Ni jiꞌi̱ Cristo chaꞌ cajaa cuentya jiꞌna, masi tya ntsuꞌu tsa quiꞌya jiꞌna.

⁹Tsoꞌo lacua. Cua laca ngua tsoꞌo cresiya jiꞌna cuentya jiꞌi̱ ycuiꞌ Ndyosi, xquiꞌya chaꞌ ndyalú tañi ycuiꞌ Cristo loꞌo ngujuii yu lo crusi. La cuiꞌ juaꞌa̱ cua lijya̱ nclyaá na juani; xquiꞌya Cristo ngaꞌaa xcubeꞌ Ni jiꞌna loꞌo tye chalyuu.

¹⁰Tyaꞌa cusu̱u̱ ycuiꞌ Ndyosi ngua na; pana juani ngua stuꞌba chaꞌ jiꞌna loꞌo Ni, nu loꞌo ngujuii Sñiꞌ ycuiꞌ Ni lo crusi. Biꞌ chaꞌ juani ngua ti̱ chaꞌ jiꞌna loꞌo ycuiꞌ Ndyosi, loꞌo juaꞌa̱ cuaꞌni lyaá Ni jiꞌna xquiꞌya chaꞌ cua ndyuꞌú nu Jesús biꞌ chaca quiyaꞌ.

¹¹Ni siꞌi tsa lo cua ti chaꞌ, masi loꞌo chaꞌ tsoꞌo tsa ntsuꞌu tyiquee na ñaꞌa̱ na jiꞌi̱ ycuiꞌ Ndyosi xquiꞌya Jesucristo nu Xuꞌna na, chaꞌ biꞌ laca nu nguaꞌni chaꞌ caca ca stuꞌba chaꞌ jiꞌna loꞌo Ni.