Rom 5:3-11

³Si vivi tabu na tahuna e huriki ri vakamadihi hita a vuhuna si luhoi torea e Kristo. Si vivi, a vuhuna si lohoka vona na tahuna si bole a nimadihi, si tovo ni hatenono na nimadihi.

⁴Na tahuna si hatenono, a Vure i vivi ne hita. Na tahuna a Vure i vivi ne hita, bara si pasimata ni masia.

⁵Na tahuna si pasimata na Vure, i uka ma si gi pasimata tavula, a vuhuna a Vure i habi ne hita a Hanu Kiripiripi. Ra Viri i vakasiri hita na Vure i ngaru hateka hita.

⁶Na tahuna si keri ni korimule hita, e Kristo i mate na parava a Vure i vulakia ge mate vona, ge korimule hita e huriki a bakovi hale.

⁷I uka tara viri koea na malala ge ngaru ni mate ni korimulea e turana. Pali a bakovi takutaku kunana bara i ngaru ni mate ne vona ni korimule a bakovi kamumu.

⁸Pali a Vure i vakasiri i ngaru hateka hita. Na tahuna si tabana ni muri mai a naro hale, e Kristo i mate ni korimule hita.

⁹I mavonga i muholi hateka e Kristo ge korimule hita na rongova na Vure, a vuhuna a darana i rata hita si malamala na matana Vure.

¹⁰Na tahuna hita a pile na Vure, i ratea a dala ne hita si gi made turana na nivalemu. I ratea a dala iea na matenga ne Tuna. Ngane i muholi hateka, e Tuna i korimule hita na rongova na Vure, a vuhuna i mahuri mule.

¹¹Tara maki tabu: si vivi vona a maka maki a Vure i rata ne hita, a vuhuna e Isu Kristo a Bakovi Dagi i mate na murine hita, si gi made na nivalemu turana Vure.