Romu 16:8-27

⁸Ampliatusina, Ramofompi navesinentua ronenimofona musenke hunteho.

⁹Magoka Kraisi eri'za e'neruna ne' Ubanusina musenke hunentena, knare roneni'a Stekisina musenke huntoe.

¹⁰Kraisi eri'za tamage huno eneria ne' Apelesi musenke hunentena, Aristobulusi nompi nemniza nagara, musenkea huzmantoe.

¹¹Nagri nagapinti ne' Herotionina musenke hugantene hutma asamiho. Nasisusi nompi, Ramofonte mni'nazana nagakura musenke huramante huta zmasamiho.

¹²Ramofonte eri'za hanavetike eneri'a atre Traifena ene Traifosakigiznia musenke huranantene huta znasamiho. Ramofonte tusi'za huno hanavetino eri'zama enerige'na navesinento'a a'mofo Pesisinena musenke hugante'ne huta zmasamiho.

¹³Rufusina Ramo, Agri'a suzane huno huhamprinteno avrenemofone, agri nerera'a nagri'enena nenareraza hu'nea ara musenke hugantene huta asamiho.

¹⁴Asinkritusima, Flegonima, Hemesima, Patrovasima, Hemasi'zanema nemaniza tafuhe'ine, tasarahehe'ina musenke huramantene huta zmasamiho.

¹⁵Filogusima, Juriama, Nereusi ene nesaro a' ene, Olimpasi ene, ana miko Anumzamofonte mani'naza nagatega musenke huramantene hutma zmasamiho.

¹⁶Maka Kraisi mono nagamo'za tmagri'tega musenke atrazageno vie. Fatgo huno ruotge hu'nea avu'ava hutma agi hene, agona ahene hutma maniho.

¹⁷Nafu nagnahete, hankavetina ama kea neramasamue, Amu'notamifima atane'zama avrenente'za, koma rempi huramigeta antahi'naza ke'ma, havigeretima eme rempi huramiza tamentintima eri kragogo negiza vahekura, kva hunetma mani kore hutma ogantu'a maniho.

¹⁸Na'ankure e'i ana vahe'mo'za Rantimofo Kraisi eri'zana e'norizanki, zamagra'a knare zankuke nentahize. Haga huno masave ke zmireti, fatgo zmavu'zmavama nehza nagara zamarevatga nehaze.

¹⁹Kema amage nentaza tamavutmavamofo nanekea maka vahe'mo'za antahivgare'naze. Hianagi tmagrikura musezanimo'a avite'ne. Hianagi nagri'ma navenesiana, knare antahintahizanteti tamagra knare'ma hu'nesia avu'ava nehutma kefozana osiho.

²⁰Arimpa fru Anumzamo'a kofa huno Satana, kagafi azeri antefenka anteno rehapatigahie. Rantimofo Jisasi Kraisi asuntgizamo'a tamagra ne mesie.

²¹Magoka eri'za eneru'a ne'mo Timoti musenke atreramante. Anahukna hu'za nagri nagamo'za, Lusiusima, Jesonima Sosipeta'zanena musenke hurmantaze.

²²Nagra Tertiusina, Poli ke nehigena ama avoma kre'noa ne'mo'na musenke Ra'mofompi hurmantoe.

²³Kaiusia noma'afi nagri ene mono kevu nagamota tavrentegeta muse huta amafi nemnuna ne'mo, tamagritega musenke atreramante. Erastusi'a rankumamofo zgore kegva hu'nea rankva ne'mo ene Kuatusi'a, mono nerafu, tmagritega musenke atrermantaze. Rantimofo Jisas Kraisi asomumo maka tamagrane mesnie.

²⁵Anumzamo'a tmagrira knare musenkema neramasamua kante tmazeri hankavetise. E'i Jisasi Kraisi knare musenkene, vahe'mota tmavresigu korapa oku'a retro hunte'nea naneke neramasamue.

²⁶Hianagi manivava Anumzamo huzamantege'za, kasnampa vahe'mo'za avontafepina krente'naze. Ama ana kemo'a megi'a vahete eama hige'za, maka kaziga vahe'mo'za negaze. Hu'negu zamagranena nege'za zamentinti nehu'za amage antesazegure.

²⁷Agrake, knare antahizane Anumzamo, Jisas Kraisimpi, ra agi'a erivava hugahie. Tamage.