Rom 16:8-27

⁸Mot in pitar anung a marmaris torom o Ampliatus, i ra a nem doko i una risan a Labino.

⁹Mot in pitar anung a marmaris torom o Urbanus, ara tene pinapam kai tagun met una pinapam anun o Karisito, ma torom a wakak na pasang kai o Stakis.

¹⁰Mot in pitar anung a marmaris torom o Apelis, i ra di sa lar tari ma i upuaso i lena i a tene nurnur mulus un o Karisito. Mot in pitar anung a marmaris torom det ra tagun a rumu anun o Aristobulus.

¹¹Mot in pitar anung a marmaris torom o Erodion, a kukung. Mot in pitari kai anung a marmaris torom det tagun a rumu anun o Nakisus ra det tagun a Labino.

¹²Mot in pitar anung a marmaris torom o Tripina ma o Triposa. Aru ino ri, der sa pam tar a dekdek na pinapam sur a Labino. Mot in pitar anung a marmaris torom ara wakak na pasang kai o Pesis, ara ino ra i sa pam tar a dekdek na pinapam sakit sur a Labino.

¹³Mot in pitar anung a marmaris torom o Rupus, i ra a Labino i pilok pasi. Mot in pitar anung a marmaris torom o nano kai. I warut iau elar ut nam o nang.

¹⁴Mot in pitar anung a marmaris torom o Asinkritus, Plegon, Ermes, Patrobas, Ermas ma a kum tistisin dat kai una nurnur ra det kis tomo nam det.

¹⁵Mot in pitar anung a marmaris torom o Pilologus ma o Julia, o Nereus ma a tisino a ino, ma o Olimpas, ma a taro rop anun o God ra det kis tomo nam det.

¹⁶Ra mot epastorom, mot in maris etetalai mot nama egom na marmaris, ma mot in pami elar nami ra mot anun o God. A taro na lotu anun o Karisito tagun a kum tamon rop, det pitar anundet a marmaris torom mot.

¹⁷A kum tistising, a saring mot sur mot in tumarong mot gusun a taro ra det ser pagol susuaro a taro na lotu, ma det watung a kum wasiso ra i turbat a kum etowo ra mot sa rakon pasi. Mot in nan gisen gusun det.

¹⁸A ngas na taro ra, awu sur det mur anundat a Labino o Karisito, awu. Det muri ut a nemnem ina pinindet. Det ser wasiso nama kum namnamin na wasiso ma a wasiso na ugasgas, sur det in usobor a taro ra ka det mananos wakak.

¹⁹A taro rop det sa talapor lena mot sa mur a wasiso anun a Labino, ra a gas doko nam mot. Ikut, a nemi sur mot in mananos wakak un asau ra i wakak, ma gong mot lason un asau ra i laulau.

²⁰Ma o God, i ra a kibin a malmal, milau mo in pas ginogino o Satan utuntudu ina kum kikimot. A marmaris anun anundat a Labino o Iesu in kis tomo nam mot.

²¹O Timoti, ra mir papam tomo una pinapam anun o Karisito, i pitar anun a marmaris torom mot. Ma a tulu kukung kai, o Lusius, o Jeson ma o Sosipater, detul pitar anundetul a marmaris torom mot.

²²Iau kai, o Tertius, ra a tumus a kum wasiso anun o Pol una pas ri, a pitar anung a marmaris torom mot nama risan a Labino.

²³O Gaius i pitar anun a marmaris torom mot. A musano ri i gas pas iau, tomo nama taro na lotu rop, ma i papos anun a rumu torom met. Ma o Erastus a tene tamtamabat a mani tagun a tamon ri, ma o Kwatus a tisindat, der kai der pitar anunder a marmaris.

²⁵O God i pet lar pasi sur in utur dekdek mot una nurnur, elar nam anun a Wakak na Wasiso ra a ser warawai nami, a Wakak na Wasiso un o Iesu Karisito. Tagitiro numugu utmakai, a Wakak na Wasiso ra i kis eno.

²⁶Ikut uniri, i sa wanpat puaso. Met wasiso talapor una sau ra a kum poropet det watung tari un o Karisito. Met pami elar nami ra o God, i ra i laun tukum, i inanos tar met sur met in pami, sur a taro tagun a kum gapman rop, det in nurnur ma det in mur a wasiso anun o God.

²⁷Dat in watung ulabo pas o God, i ra ara God kut, ra a tene mananos. Dat in watung ulabo pasi kibino un o Iesu Karisito, uniri ma numur ma ken rop. Amen.